თბილისის საქალაქო სასამართლოში, ხორავას ქუჩაზე დავით სარალიძის განზრახ ჯგუფურად მკვლელობის ბრალდებით დაკავებული მიხეილ კალანდიას სასამართლო პროცესი დასრულდა. დღევანდელ პროცესზე 9 ექსპერტი და გამომძიებელი დაიკითხა.
როგორც მიხეილ კალანდიას ადვოკატმა, ზურაბ თოდუამ სხდომის დასრულების შემდეგ ჟურნალსიტებს განუცხადა, ექსპერტების დაკითხვისას რამდენიმე მნიშვნელოვანი დეტალი გახდა ცნობილი.
“ძალიან მნიშვნელოვანი რამ გაირკვა დღეს. 51-ე საჯარო სკოლის წინ გადაღებულ ვიდეოკადრზე ხელში რა საგანი უჭირავს მიხეილ კალანდიას, ამაზე დღეს დაკითხულმა ექსპერტმა ვერ გასცა პასუხი, მაგრამ მისი ფერადი სურათის დათვალიერების შედეგად აშკარად ჩანს, რომ მიხეილ კალანდიას მარჯვენა ხელში უჭირავს შავი ფერის საგანი, რომელსაც არ აქვს დაფარული მისი ოთხი თითიც კი, ანუ ეს საგანი სავარაუდოდ უნდა იყოს 3 სანტიმეტრიდან 3/5 სანტრიმენტამდე, ამაზე დიდი არ შეიძლებოდა ყოფილიყო. ჩემი კითხვა ექპსპერტის მიმართ, შეეძლო თუ არა განესაზღვრა, რა ზომის იყო ეს ნივთი, განმარტა რომ მისთვის გამოძიებას ასეთი კითხვა არ დაუსვამს, აქედან გამომდინარე ის ამაზე ვერ იმსჯელებს. ასევე გაირკვა მეტად მნიშვნელოვანი საკითხი, გამომძიებლის მიერ შესრულებული საგამოძიებო მოქმედებები ცალსახად მიუთითებს ერთ კონკრეტულ გარემოებაზე, რომ გამოძიება თავის დროზე ჩატარდა უხარისხოდ და მხოლოდ 8 თვის შემდეგ გამოძიებამ მიიღო დადგენილება, ხელახლა დაათვალიეროს შემთხვევის ადგილი. სასაცილოა და პაროდიაა, როცა 8 თვის შემდეგ იწყებენ რეალურ გამოძიებას”, – განაცხადა ადვოკატმა.
საქმეზე შემდეგი სასამართლო სხდომა 27 დეკემბერს, 11:30 საათზე, გაიმართება.