დავით სარალიძის განზრახ მკვლელობაში ბრალდებულმა გიორგი ჯანაშიამ აღიარა დანაშაული და გამოძიებასთან ითამამშრომლა – ამის შესახებ საქმის პროკურორმა თორნიკე ნადირაძემ უზენაეს სასამართლოში ხორავას საქმის განხილვის დაწყებამდე განცხადება გააკეთა.
პროკურორის თქმით, ჯანაშიამ ითამამშრომლა გამოძიებასთან და მასთან საპროცესო შეთანხმებაა მიღწეული. რა პირობებს მოიცავს საპროცესო შეთანხმება, მას არ დაუკონკრეტებია. უზენაეს სასამართლოში ამ საკითხზე დღეს პროკურატურა შუამდგომლობას დააყენებს.
უზენაეს სასამართლოში დღეიდან ხორავას ქუჩაზე დავით სარალიძისა და ლევან დადუნაშვილის მკვლელობაში მსჯავრდებული გუგა ბარბაქაძისა და გიორგი ჯანაშიას საქმის განხილვა დაიწყო.
პირველი ინსტანციის სასამართლოს გადაწყვეტილებით, გიორგი ჯანაშიას 9 წლითა და 9 თვით თავისუფლების აღკვეთა, ხოლო გუგა ბარბაქაძეს 10 წლითა და 6 თვით თავისუფლების აღკვეთა შეეფარდა. საქალაქო სასამართლოს აღნიშნული გადაწყვეტილებით, გიორგი ჯანაშია ცნობილ იქნა დამნაშავედ დავით სარალიძის დამამძიმებელ გარემოებაში განზრახ მკვლელობის მცდელობაში, ხოლო, გუგა ბარბაქაძე ლევან დადუნაშვილის განზრახ მკვლელობაში.
თბილისის საქალაქო სასამართლოს გადაწყვეტილება როგორც დაცვის, ასევე ბრალდების მხარემ გაასაჩივრა.
2017 წლის 1-ელ დეკემბერს თბილისის ცენტრში, ვერაზე ორი არასრულწლოვანი, დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე – მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.