მაჩალიკაშვილების ადვოკატი მარიამ კუბლაშვილი დღეს განცხადების გავრცელებას აპირებს. ამის შესახებ მან სოციალურ ქსელში დაწერა.
“თემირლან მაჩალიკაშვილის საქმეზე დღეს გავაკეთებ ვრცელ კომენტარს, მოგვიანებით კი წერილობით დასკვნას წარმოგიდგენთ.
მიმაჩნია, რომ ჩვენ უკვე გავიმარჯვეთ ერთი მარტივი მიზეზის გამო: ჰქონდა თუ არა თ. მაჩალიკაშვილს რაიმე სახის პირდაპირი კონტაქტი ა. ჩატაევთან, იცოდა თუ არა მისი საქართველოში ყოფნის შესახებ, ამავდროულად, ჰქონდა თუ არა ინფორმაცია ჩეჩენი ეროვნების ტურისტების (როგორც ეს უკანასკნელი და ბევრი ადამიანი იცნობდა) წარმომავლობის, კავშირების და ზრახვების შესახებ? – ამ კითხვებზე პასუხი არ გაცემულა და უფრო მეტიც, დასტურად ერთი მტკიცებულებაც არ არაებობს.
დადგენილია, რომ ამ პიროვნებებს თემირლანი და პანკისელები, სრულიად სხვა სახელით და გვარით იცნობდნენ, კერძოდ, მეტსახელებით – ,,სეიფულა” და ,,აბდულა”. ან რატომ გაუმხელდა 19 წლის ახალგაზრდას გამოცდილი ტერორისტი საკუთარ ზრახვებს და ადგილმდებარეობას? ეს ხომ აბსურდია. სწორად შერჩეული ტაქტიკაა, რადგან ჩვენ გადავერთეთ თვითმართლებაზე, აუტანელი სულიერი ტკივილი განიცადა ოჯახმა პროკურატურის მიერ საქმის შეწყვეტაზე უმეტესად, სასტიკ ცილისწამებასა და თემირლანის სახელის განზრახ, ტერორიზთან გაიგივებაზე. შეგახსენებთ, რომ ქ. თბილისის პროკურატურაში გამოძიება მიმდინარეობდა კონკრეტულად თ. მაჩალიკაშვილის გარდაცვალების ფაქტთან დაკავშირებით. გადაამეტა თუ არა სპეცრაზმელმა უფლებამოსილებას, აუცილებელი იყო თუ არა ლეტალური ძალის გამოყენება და რა შუაშია სწორედ ამავე საქმეზე შეწყვეტილ გამოძიებასთან ახმედ ჩატაევის ცხოვრების, წარსულის ან სხვა დაკავებული პირების ისტორიებით აპელირება? პასუხი აქაც მარტივია: რადგან ეს მიზანმიმართულად ხდება, რათა ნაკლები სიბრალულის განცდა დაეუფლოს საზოგადოებას, რითაც გაქრება ინტერესი და სურვილი გაიგონ, რატომ არ დააკავეს, რატომ არ დაკითხეს უფრო ადრე, ლოგინის თავთან მდგომმა სპეცრაზმელმა რატომ ვერ მოახერხა, როგორც თავად აღნიშნავს ,,ვიდრე თემირლანი გადაიხრებოდა, მოძებნიდა ხელყუმბარას, შემდეგ მოამზადებდა მას და ორივე ხელით შეეცდებოდა მის საბრძოლო მდგომარეობაში მოყვანას”, უბრალოდ ამ პერიოდში მისი დაკავება ან ხელის დაჭერა ან ყველაზე უკიდურეს შემთხვევაში, ხელშივე სროლა? რატომ მოუსპო სალიკვიდაციო გასროლით მაინცდამაინც სიცოცხლე სხვისა შვილს, რომელსაც სიცოცხლის უფლებაც ჰქონდა , ისევე როგორც დაცვის უფლება? რა უფლება აქვს პროკურატურას სპეცრაზმელის ჩვენების პოზიციონირებით, სუბიექტური აზრი დააფიქსიროს და შეფასებები გააკეთოს საჯაროდ და საზოგადოება შეიყვანოს შეცდომაში?
გახსოვდეთ, რომ ჩვენც, ისევე როგორც ნებისმიერი ადამიანი სასტიკად ვგმობთ ტერორიზმს, ვემიჯნებით მას და მივიჩნევთ, რომ ეს ნამდვილად გახლავთ გამოუთქმელი სისასტიკე. მაჩალიკაშვილების ოჯახი მსხვერპლია როგორც საერთაშორისო ტერორისტების, აგრეთვე, იმ სტრუქტურების, რომლებმაც გადაამეტეს ძალას, აღნიშნულს არ დასჯერდნენ, მოახდინეს მტკიცებულებათა ფალსიფიცირება და მოგვიანებით, საჯარო გამოსვლებით თუ მიზანმიმართული პროპაგანდით, გარდაცვლილ ბავშვს პირდაპირ ტერორისტობა დასწამეს. ბოლოს მაინც შეგახსენებთ, რომ თავის დროზეც კი, თ. მაჩალიკაშვილის სიცოცხლეშივე, დაკავების საფუძვლებში თუ მოსალოდნელი ბრალდების დადგენილების შინაარსში, მოაზრებული უნდა ყოფილიყო არა ტერორიზმის მხარდაჭერა, არამედ, ტერორიზმთან კავშირში მყოფი ადამიანების დახმარება. ნორმის დისპოზიცია სავალდებულოდ მოითხოვს განზრახვას, ანუ თემირლანს უნდა სცოდნოდა, გააზრებული უნდა ჰქონოდა, მაშინ, როდესაც ტელეფონის საყიდლად გაჰყვა ჩეჩენი ეროვნების მამაკაცებს, ისინი ტერორისტები იყვნენ და აღნიშნულ ნივთს, სწორედ ტერორისტული მიზნებისთვის იძენდნენ. რამხელა აბსურდია მთელი ეს საქმე იმედია ხვდებით, იმედია იმასაც ხვდებით თუ რაში დასჭირდათ ვრცელი გადაცემის მიძღვნა და აქცენტის გადატანა ტერორიზმზე და არა უშუალოდ იმ თემაზე, რაზეც გამოძიება შეწყდა. რატომ მოკლეს თემირლანი…?
ამ და სხვა თემებზე დღეს ვრცლად!” – წერს კუბლაშვილი.