გიორგი რურუა სასამართლო პატიმრობაში დატოვა. „მთავარი არხის“ მეწილის ადვოკატმა დიმიტრი საძაგლიშვილმა ჟურნალისტებს განუცხადა, რომ ეს გადაწყვეტილება მოულოდნელი არ იყო, რადგან მისი თქმით, ეს არის სასამართლო პროცესი, რომელზეც მოსამართლეები პოლიტიკურ ნებას ასრულებენ.
ადვოკატი სასაცილოდ მიიჩნევს ბრალდების მხარის არგუმენტს, რომ გიორგი რურუას მეუღლეა დასაკითხი და არსებობს რისკი, რომ მეუღლეზე გავლენას მოახდენს.
გიორგი რურუა პოლიციამ 2019 წლის 18 ნოემბერს სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავა, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
მედიაში 24 სექტემბერს გავრცელდა ინფორმაცია, რომ პოლიტიკოს ნიკა რურუას ძმამ გიორგი რურუამ „მთავარის“ მეწილისგან კახა ანჯაფარიძისგან 2.5%-იანი წილი იყიდა, რაშიც, როგორც ნასყიდობის ხელშეკრულებაშია მითითებული, 2 500 ლარი გადაიხადა.
