რა თქმა უნდა, როდესაც ხდები ექიმი, პირველი კურსიდან გაქვს სურვილი, გადაარჩინო ადამიანი, მაგრამ ეს იმას არ ნიშნავს, რომ შენი მეზობელი უნდა გიბიძგებდეს ამ ქმედებისკენ, თვითონ კი არ იცავდეს დასაცავ ზომებს, რის გამოც შენ იძულებული ხდება ჩაერთო ამ რთულ ბრძოლაში, – ამის შესახებ ჯანდაცვის მინისტრმა ეკატერინე ტიკარაძემ „იმედის“ გადაცემაში „ღია ეთერი“ განაცხადა.
„რაც შეეხება ექთნებს, მე არ მინდა მათი ფუნქცია დაკნინდეს, ვინაიდან კარგი ექთანი უმეტეს შემთხვევაში ძალიან მნიშვნელოვანია. ისინი ატარებენ პაციენტთან ძირითად ტვირთს, რომელიც ხშირ შემთხვევაში უფრო ინტენსიურია, ვიდრე ექიმის. გამოსავალი არის, მაგრამ ამაზე თუ დავფიქრდებით, მივხვდებით, რომ ეს კარგი გამოსავალი არაა. რა თქმა უნდა, შეგვიძლია, ვთხოვოთ დახმარება მეხუთე და მეექვსე კურსის სტუდენტებს, მაგრამ სურთ თუ არა მათ მშობლებს, რომ მათი შვილები ამ კრიტიკულ მდგომარეობაში მოხალისეები იყვნენ. რა თქმა უნდა, როდესაც ხდები ექიმი, პირველი კურსიდან გაქვს სურვილი, გადაარჩინო ადამიანი, მაგრამ ეს იმას არ ნიშნავს, რომ შენი მეზობელი უნდა გიბიძგებდეს ამ ქმედებისკენ, თვითონ კი არ იცავდეს დასაცავ ზომებს, რის გამოც შენ იძულებული ხდება ჩაერთო ამ რთულ ბრძოლაში. თუმცა მე დარწმუნებული ვარ, რომ ჩვენი ახალგაზრდები ამას გააკეთებენ. ისინი უკვე გამოხატავენ ამ სურვილს, მაგრამ ამით არ უნდა ისარგებლოს საზოგადოებამ“, – განაცხადა ტიკარაძემ.
საქართველოში კორონავირუსი 296 ადამიანს დაუდასტურდა, მათგან 69 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.