პრეზიდენტ ტრამპის ახალი გეგმა, უკრაინისთვის იარაღის გაგზავნისა და პარალელურად რუსეთის სავაჭრო პარტნიორებისთვის მკაცრი სანქციების დაწესების მუქარა, ასახავს ომთან დაკავშირებით მის პოზიციაში მკვეთრ ცვლილებას, თუმცა მისი შეთავაზებები ძირითად დეტალებს გაურკვეველს ტოვებს, – წერს ამერიკული გამოცემა The New York Times-ი.
ნატოს გენერალურ მდივან მარკ რუტესთან ერთად გამოსვლისას, ტრამპმა განაცხადა, რომ Patriot-ის საჰაერო თავდაცვის სისტემები და სხვა შეიარაღება „სწრაფად“ გადაეცემა უკრაინას, რომელსაც სასწრაფოდ სჭირდება მეტი იარაღი რუსეთის შემოჭრის მოსაგერიებლად.
ტრამპმა განაცხადა, რომ შეერთებული შტატები ამ შეიარაღებას მიჰყიდის ევროპულ ქვეყნებს, რომლებიც მას ან უკრაინას გაუგზავნიან, ან გამოიყენებენ საკუთარი მარაგებიდან უკრაინაში გაგზავნილი იარაღის შესავსებად.
მაგრამ პენტაგონის ოფიციალურმა პირებმა მოგვიანებით განაცხადეს, რომ უამრავი დეტალი ჯერ კიდევ დამუშავების პროცესშია.
ექსპერტებმა ეჭვქვეშ დააყენეს ტრამპის მუქარის სანდოობა, რომლის მიხედვითაც, ის რუსეთის სავაჭრო პარტნიორებს 100-პროცენტიან ტარიფებს დაუწესებს, თუ ვლადიმირ პუტინი 50 დღის განმავლობაში ცეცხლის შეწყვეტას არ დათანხმდება.
ჩინეთის ურთიერთვაჭრობის მასშტაბები რუსეთთან – თითქმის 250 მილიარდი დოლარი წელიწადში, ნავთობის უზარმაზარი იმპორტის ჩათვლით – ნიშნავს, რომ ამ მუქარის განხორციელება ტრამპს პეკინთან დაპირისპირების რეჟიმში ჩააგდებდ.
ანალიტიკოსებმა განაცხადეს, რომ ნაკლებად სავარაუდოა, ტრამპი უკრაინის გამო მსოფლიოს მეორე უმსხვილეს ეკონომიკასთან განახლებული კონფრონტაციის რისკზე წავიდეს, მით უმეტეს, რომ ამ ქვეყნის [უკრაინის] ბედი, მისი თქმით, არ არის სასიცოცხლოდ მნიშვნელოვანი ამერიკის შეერთებული შტატებისთვის.
„ტრამპი ასევე ცნობილია იმით, რომ აწესებს ვადებს, რომლებსაც არ აღასრულებს, რაც კითხვებს აჩენს, იმოქმედებს თუ არა ის, როდესაც პუტინისთვის დაწესებული 50-დღიანი ვადა ამოიწურება“, – აღნიშნულია სტატიაში.