მიმდინარე წლის 1 მაისის გადაწყვეტილებით ამერიკის შეერთებული შტატების FDA-იმ მძიმედ მიმდინარე COVID 19-ით ჰოსპიტალიზებული პაციენტების სამკურნალოდ, კლინიკურ კვლევებში მყოფი მედიკამენტებიდან რეკომენდაცია მისცა მედიკამენტ „რემდესივირის“ (Remdesivir) გამოყენებას. ანალოგიური რეკომენდაცია აშშ FDA-იმ 28 მარტის გადაწყვეტილებით კლინიკურ კვლევებში მყოფ კიდევ ერთ მედიკამენტს, ჰიდროქსიქლოროქინს, იგივე პლაქვენილს მისცა, რომელიც საქართველოში უკვე წარმატებულად გამოიყენება COVID-19-ით პაციენტების სამკურნალოდ, –ამის შესახებ ინფექციური საავადმყოფოს დირექტორი თენგიზ ცერცვაძე აცხადებს.
მისი თქმით, პრეპარატ რემდესივირზე მაღალი საზოგადოებრივი ინტერესი არსებობს და განმარტავს, რომ იგი თავის დროზე ამერიკული კომპანია Gilead Science-ის მიერ ებოლას ცხელების სამკურნალოდ შეიქმნა , მაგრამ ამ დაავადების დროს ეფექტიანი არ გამოდგა.
„ა.წ. 29 აპრილს აშშ-ს ნაციონალური ინსტიტუტების ალერგიისა და ინფექციურ დაავადებათა ინსტიტუტის (NIH/NIAID) დირექტორმა და დარგის ლიდერმა პროფესორმა ანტონი ფაუჩიმ განაცხადა, რომ მისი ინსტიტუტის ხელმძღვანელობით ჩატარებული საერთაშორისო კლინიკური კვლევის ფარგლებში შესწავლილ იქნა რემდესივირის ეფექტიანობა COVID-19-ის სამკურნალოდ და წინასწარი მონაცემებით მიღებულია დამაიმედებელი შედეგები, კერძოდ რემდესივირით მკურნალობამ უზრუნველყო პაციენტთა გარკვეული ნაწილის შედარებით უფრო მოკლე დროში გამოჯანმრთელება. პროფესორმა ფაუჩიმ ისიც აღნიშნა, რომ მედიკამენტი რემდესივირი შესაძლოა COVID-19-ით პაციენტების ძირითადი სამკურნალო საშუალება გახდეს.
შესაბამისად, აშშ FDA, სადღეისოდ არსებულ სამეცნიერო მტკიცებულებებზე დაყრდნობით, რემდესივირს COVID-19-ის სამკურნალო ეფექტიან მედიკამენტად მიიჩნევს. თუმცა ეს მაინც წინასწარი ვარაუდია და აღნიშნული მედიკამენტის რეალური ეფექტიანობის დადგენა და შესაბამისად მისი საბოლოოდ ოფიციალური დამტკიცება შესაძლებელი გახდება მიმდინარე სხვა მასშტაბური კლინიკური კვლევებით მიღებული შედეგების გაანალიზების შემდგომ“ – განაცხადა თენგიზ ცერცვაძემ.
საქართველოში კორონავირუსი 589 ადამიანს დაუდასტურდა, აქედან 221 ადამიანი უკვე გამოჯანმრთელდა. გარდაიცვალა 9 პაციენტი.