გუშინ ნამდვილად ისტორიული დღე იყო. ეს არის პირველი შორ მანძილზე ფრენა, რომელიც საქართველოს ისტორიაში შესრულდა. შანხაი-თბილისის მიმართულებით გუშინ საღამოს დაეშვა რეისი, რომელიც 98%-იანი დატვირთულობით იყო და უნდა აღინიშნოს, რომ შემდეგი რეისები სრულად სავსეა, – განაცხადა „დღის ქრონიკასთან“ ტურიზმის ეროვნული ადმინისტრაციის ხელმძღვანელმა მაია ომიაძემ.
მისი თქმით, საქართველოს მიმართ ჩინელი ტურისტების დაინტერესება ბევრმა ფაქტორმა განაპირობა, მათ შორის არის უვიზო მიმოსვლა და პირდაპირი რეისები.
მაია ომიაძის განცხადებით, ბოლო წელს 44%-ით გაიზარდა ჩინეთიდან ვიზიტორების რაოდენობა.
მისი თქმით, ქართულ მხარეს მოლოდინი აქვს, რომ შანხაისთან პირდაპირი რეისები სტატისტიკას მნიშვნელოვნად გაზრდის.
„როდესაც ადამიანი ახალი დანიშნულების ადგილს არჩევს სამოგზაუროდ, რა თქმა უნდა ბიუროკრატიულად, რომელიც უფრო მარტივია, იმას აირჩევს და რა თქმა უნდა არჩევანს გააკეთებს იმ ადგილზე, სადაც პირდაპირი რეისია, სადაც სავიზო რეჟიმი არ მოქმედებს. საქართველო ჩინელებისთვის სწორედ ასეთი ახალი დანიშნულების ადგილია, სადაც მიმოსვლა მარტივია, სადაც უვიზო რეჟიმია და სადაც სტუმარ-მასპინძლობა უმაღლეს დონეზეა“, – განაცხადა მაია ომიაძემ.