ნიკოლოზ ბასილაშვილი 100 ათას ლარიანი გირაოს სანაცვლოდ გათავისუფლდება – გადაწყვეტილება თბილისის საქალაქო სასამართლომ მიიღო. ჩოგბურთელს არასრულწლოვნის თანდასწრებით, ყოფილ ცოლზე ძალადობას ედავებიან.
ბრალდებული დანაშაულს არ აღიარებს. “კურიერმა” ცოტა ხნის წინ დაზარალებული ნეკა დოროყაშვილი ჩაწერა. მას ახლა ექსპერტიზა უტარდება, ამ პროცედურის გავლამდე კი ბრალდებული ჩოგბურთელის ნიკოლოზ ბასილაშვილის ყოფილმა მეუღლემ “კურიერს” დეტალები გაუმხილა და ძალადობაში ყოფილი მეუღლე და მამამთილი დაადანაშაულა.
ნეკა დოროყაშვილმა “კურიერთან” საუბრისას დაპირისპირებაზე, რომელიც 2 დღის მოხდა დეტალურად ისაუბრა.
მისი განცხადებით, დაპირისპირება მას შემდეგ დაიწყო, რაც ნიკოლოზ ბასილაშვილის სახლში მცირეწლოვანი შვილის წამოსაყვანად მივიდა.
ნეკა დოროყაშვილის თქმით, მას ფიზიკური დაზიანებები ყოფილმა მეუღლემ მიაყენა, ყოფილი მამამთილი კი ემუქრებოდა.
“არანაირ კავშირში არ ყოფილა ამ ინციდენტთან ქონებრივი დავა. დასრულებული გვქონდა ქონებრივი დავის საკითხი დიდი ხნის წინ. მოლაპარაკებით დავასრულეთ.
ბავშვს მივაკითხე წამოსაყვანად. დაპირისპირების მიზეზი ჩემთვის დღემდე გაუგებარია, უბრალოდ მივაკითხე ჩემს შვილს წამოსაყვანად. ექსპერტიზა ჩამიტარდა და ახლაც მიმდინარეობს. გირაოთი რომ გამოუშვებდნენ, არ ველოდი,” – განაცხადა ნეკა დოროყაშვილმა “კურიერთან“.
“ჩემს დანახვაზე, როცა მივაკითხე ჩემს შვილს, არ ვიცი რა მოუვიდა, მთვრალი იყო თუ რა სჭირდა არ ვიცი, გამოგვეკიდა მე და ჩემს შვილს რაღაცა იარაღით.
თვითონ იძახის, რომ ეს იყო გიტარა, თუ რაღაც.
მე ვერ ვადასტურებ რა იყო, იმიტომ, რომ რაღაც დიდი ტარი ჰქონდა, მე მგონი იყო ნაჯახი.
მე არც მახსოვს ეს დეტალები, ბავშვი. მეჭირა ხელში და გამოვიქეცი.
ერთი ის მახსოვს, რომ რაღაც მანქანაში ჩავჯექი. კონკრეტულად დეტალებს ვერ ვიხსენებ. მამა გამომეკიდა რაღაცა საგნით, რა საგანი იყო არ ვიცი, ჰქონდა ძალიან დიდი ტარი” – აღნიშნა ნეკა დოროყაშვილმა.