„ამ წერილებსა და ანგარიშებზე რუსთაველის აფორიზმი მახსენდება: ოდეს ტურფა გაიაფდეს, აღარა ღირს არცა ჩირად”, – ექსპერტი ზაალ ანჯაფარიძე სოციალურ ქსელში აშშ-ის რესპუბლიკელთა კვლევითი კომიტეტის ანგარიშს გამოეხმაურა.
მისი თქმით, თუ ივანიშვილი პუტინის მიერ მოვლენილი და მისი ახლო მოკავშირეა, როგორც ანგარიშის ავტორები წერენ, მაშინ რატომ არის დღეს საქართველო ევროკავშირთან ასოცირების შეთანხმების წევრი და არა – ევრაზიული კავშირის?
„აშშ-ის კონგრესში მორიგი ანგარიში გამოქვეყნდა „ამერიკის გაძლიერება და გლობალურ საფრთხეებთან გამკლავება”, რომლის მიხედვითაც თურმე ბიძინა ივანიშვილი ყოფილა ჩართული საქართველოს დესტაბილიზაციაში რუსეთის სახელით.
თუმცა, იქვე აღნიშნულია, რომ საქართველო აშშ-ის დემოკრატიული მოკავშირეა, რომ ერთ სულ მოსახლეობაზე გადაანგარიშებით საქართველომ ავღანეთში ყველაზე მეტი დანაკარგი განიცადა, ვიდრე – სხვა რომელიმე ქვეყანამ. იქვე აღმატებულ ტონში საუბარია სამხედრო თანამშრომლობაზე ნატო-სთან პარტნიორობაზე და ა.შ.
ისე, თუ ივანიშვილი პუტინის მიერ მოვლენილი და მისი ახლო მოკავშირეა, როგორც ანგარიშის ავტორები წერენ, მაშინ რატომ არის დღეს საქართველო ევროკავშირთან ასოცირების შეთანხმების წევრი და არა – ევრაზიული კავშირის? რატომ აგზავნის ყველაზე მეტ ჯარისკაცს ავღანეთში? რატომ ატარებს მის ტერიტორიაზე NATO-ს წვრთნებს? და ა.შ. და ა.შ.
და კიდევ, გახსოვთ, ალბათ, „ქ/ოცნებიდან” გაქცეულ- გაგდებული საგარეო პოლიტიკური გუნდი რომ ტრაბახობდა, კონგრესს საქართველოს მხარდამჭერი აქტი მივაღებინეთო. ანგარიშიდან ირკვევა, რომ ეს აქტი სენატამდე არც მისულა. ხოლო სენატის მხარდაჭერის გარეშე ის, უბრალოდ, ვერ ამოქმედდება. ეს ისე, ცნობისათვის!
ამ წერილებსა და ანგარიშებზე რუსთველის აფორიზმი მახსენდება: ოდეს ტურფა გაიაფდეს, აღარა ღირს არცა ჩირად!”, – წერს ზაალ ანჯაფარიძე.