საპატრულო პოლიციის უფროსის, ვაჟა სირაძის დედა ეკა ლატარია სოციალურ ქსელში „მთავარ არხზე“ გასულ სიუჟეტს ეხმიანება, სადაც მისი ოჯახი, ნავთობის ბიზნესთან კავშირშია მოხსენიებული.
ეკა ლატარია, ინფორმაციას ცილისწამებად და მისი შვილის მიზანმიმართული დისკრედიტაციის მცდელობად აფასებს.
„სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. ისიც მესმის, რომ ჟურნალისტის ნებისმიერი პროფესიული უფლება–მოვალეობა გამომდინარეობს საზოგადოების უფლებიდან – იყოს ინფორმირებული მოვლენებისა და თვალსაზრისების შესახებ, თუმცა როცა საზოგადოება მიზანმიმართულად შეგყავს შეცდომაში ცრუ ინფორმაციის ტირაჟირებით, ეს უკვე დანაშაულია.
რა თქმა უნდა აბსურდია იმაზე საუბარი, რომ ჩემი ოჯახი რაიმე სახის ნავთობის ბიზნესშია ჩართული. რაც შეეხება რეპორტაჟში გასულ ინფორმაციას, ეს არის 2012 წლის ნოემბერში და არა 2020 წელს, როგორც რეპორტაჟში გავიდა, შექმნილი ფირმა „გლობალ ოილი“, მაშინ როდესაც ჩემი შვილი ვაჟა სირაძე რიგითი პოლიციელი იყო და მან არც იცის ამ ფირმის დეტალების შესახებ, სადაც მე პარტნიორი ვარ და ამ ფირმის ერთადერთ საქმიანობას ტვირთის დაცლა-დატვირთვა წარმოადგენს და შექმნიდან დღემდე სხვა არანაირი საქმიანობა არ უწარმოებია, მით უფრო არანაირი შემხებლობა ნავთობთან, მის შემოტანასთან ან გადამუშავებასთან არ გააჩნია და ესეც საჯარო ინფორმაციაა.
თითოეული ჩვენგანის შემოსავლები, მათ შორის ამ ფირმის საქმიანობიდან მიღებული შემოსავალი და ქონება დეკლარირებულია და მისი მოკრძალებული ოდენობის გათვალისწინებით, არა მგონია ნავთობის ბიზნესში ჩართული ოჯახის ქონებას და შემოსავლებს შეესაბამებოდეს, თუმცა „მათ“ ხომ ეს არ აინტერესებდათ, სულ სხვა კითხვები დაგვისვეს და პასუხები მათთვის ჩვეული ოსტატობით სასურველ კონტექსტში ჩასვეს.
ქვეყნის და ხალხის სამსახურში ვართ ამდენი წელია და სწორედ ეს რეპუტაცია და არა ბიზნესი ან რაიმე მეტერიალური, არის ჩვენთვის ყველაზე დიდი კაპიტალი და ამას ათწლეულებია ვაშენებთ, ამიტომ როდესაც სხვა ვერაფერი ვერ იპოვეს, სწორედ იქ „დაარტყეს“, რაც ყველაზე ძვირფასია ჩვენთვის, ყოველგვარ ზღვარს გასცდნენ, ამათთვის ზღვარი ხომ არ არსებობს და კონტრაბანდისტობა და კრიმინარულ სამყაროსთან კავშირი დაგვაბრალეს, მაშინ როდესაც მთელმა ოჯახმა ჩვენი შეგნებული ცხოვრება დანაშაულთან ბრძოლას და მართლმსაჯულებას მივუძღვენით და ამ დამსახურებისთვის ვაჟა სირაძე 2015 და 2019 წლებში ორჯერაა დაჯილდოვებული მედლებით „მამაცობისათვის“.
ამ ადამიანებისთვის ცნება „არ შეიძლება“ არ არსებობს, მათი მთავარი მიზანი საკუთარი ინტერესებია, შეუძლიათ 10 წუთიან რეპორტაჟში ათწლეულობით ნაშენები ოჯახური რეპუტაცია დაგინგრიონ და ფიქრობ – როგორი რეაქცია უნდა გქონდეს ამ უმსგავსობაზე?! – პასუხი გასცე და თქვა, რომ მე არ ვარ ისეთი, რასაც ესენი კადრულობენ. ასეთ შემთხვევაში მათი მიზანი მიღწეულია, ვინაიდან საკუთარ თავზე რაღაცას გამტკიცებინებენ, მეორე – საერთოდ არანაირი რეაქცია არ გქონდეს და ასეთ შემთხვევაშიც მათი მიზანი მიღწეულია, ვინაიდან გამოდის, რომ პასუხი არ გაეცი, დუმილით დაადასტურე რაც შენზე გავრცელდა და მესამე – ესენი შენზე კი არა პატრიარქზე ამბობენ ისეთ რამეს, რაც ჩვენს მრავალსაუკუნოვან მართლმადიდებლურ ისტორიაში, არავის უკადრებია, გაუბედავს და ამისთვის პასუხი არავის მოუთხოვია, მაგრამ კიდევ ერთხელ ვამბობ, ამ ადამიანებისთვის ცნება „არ შეიძლება“ არ არსებობს.
მათი თქმით, ისინი ყოველთვის ყველაზე „მართლები”, ყველაფერში „მთავრები“ და „ჭეშმარიტები“ არიან, რამდენჯერაც არ უნდა გამოააშკარავო ყველაზე უკადრებელ სიცრუეში, რაც არაერთხელ მომხდარა, მაინც მართლები არიან და იგივეს აკეთებენ, ამათ „სიმართლეს“ მართლმსაჯულების ყველაზე დიდი ინსტანცია – ევროსასამართლოც ვერ აბათილებს. ეს გახლავთ სიცრუის და ცილისწამების დიდოსტატი და ადამიანთა სიცოცხლის გამწარების ვირტუოზი – „მთავარი არხი“.
რა თქმა უნდა ამ უმსგავსობაზე მექნება სამართლებრივი რეაგირება“, – წერს ვაჟა სირაძის დედა „ფეისბუქის“ საკუთარ გვერდზე.