„უაღრესად სამწუხარო ფაქტია, საერთაშორისო პარტნიორებთან ყოველდღიურად ვმუშაობთ, რომ მაქსიმალურად გამოვიყენოთ ყველა ინსტრუმენტი, რომელიც მთავრობას გააჩნია“, – ამის შესახებ პრემიერ-მინისტრმა ჟურნალისტებს განუცხადა, როდესაც ხვიჩა მღებრიშვილისთვის ე.წ. სამთვიანი პატიმრობის მისჯაზე ჟურნალისტების შეკითხვას უპასუხა.
„აქტიურად ვმუშაობთ ამაზე, ყველაფერი იქნება ნორმალურად“, – განაცხადა გიორგი გახარიამ.
ხვიჩა მღებრიშვილისთვის ე.წ. სამთვიანი პატიმრობის მისჯას, საგარეო უწყებაში პროვოკაციულ და დესტრუქციულ გადაწყვეტილებად აფასებენ.
ოკუპანტების მიერ დაკავებულ ხვიჩა მღებრიშვილს უკანონო პატიმრობა სამი თვით გაუგრძელდა.
ხვიჩა მღებრიშვილს დე-ფაქტო ცხინვალის სასამართლომ ორთვიანი პატიმრობა 19 ივლისს შეუფარდა. ის სოფელ მეჯვრისხევიდან 3 ივლისს გაიტაცეს. ოკუპირებული ცხინვალის ე.წ. უსაფრთხოების სამსახურის ინფორმაციით, ის „მათ ტერიტორიაზე“ ღამურების შესაგროვებლად გადავიდა. ე.წ. სახელმწიფო უშიშროების კომიტეტის ცნობით, მიმდინარე თვის დასაწყისში დაკავებული ხვიჩა მღებრიშვილი ერთი ღამურის სანაცვლოდ 5 000 დოლარის აღებას ცდილობდა.
ამ დრომდე ოკუპანტების ტყვეობაში რჩება საქართველოს კიდევ ერთი მოქალაქე, ზაზა გახელაძე. ის ოკუპანტებმა 11 ივლისს დაჭრეს და დააკავეს. ოჯახის წევრების ინფორმაციით, ის ახალგორიდან ცხინვალში გადაიყვანეს. კაცი ფეხშია დაჭრილი. საოკუპაციო ხაზთან მომხდარ ინციდენტთან დაკავშირებით ინფორმირებულია ევროკავშირის სადამკვირვებლო მისია. ამოქმედებულია ცხელი ხაზი