დარწმუნებული ვარ, რომ თქვენი გვერდში დგომით, ჩვენ, 31 ოქტომბერს, შევძლებთ კიდევ ერთი ღირსეული გამარჯვება ვიზეიმოთ, – ამის შესახებ აჭარის თავმჯდომარემ შუახევში, მაჟორიტარი დეპუტატობის კანდიდატების ანზორ ბოლქვაძის და ფრიდონ ფუტკარაძის წარდგენაზე განაცხადა.
თორნიკე რიჟვაძის განცხადებით, იმ უამრავ მიღწევას, რომელიც გვქონდა, როგორც ინფრასტრუქტურის, დაბების, სოფლების, წყალმომარაგების, ასევე საგზაო ინფრასტრუქტურის ნაწილში – სჭირდება ღირსეული გაგრძელება, კიდევ უფრო მეტი პოლიტიკური მხარდაჭერა.
„ჩვენ, ყველანი ერთად, შევძლებთ კიდევ ერთ ღირსეულ გამარჯვებას მივაღწიოთ. შუახევმა, თავისი უდიდესი პოტენციალით, ძალიან დიდი როლი ითამაშა ჩვენი ქვეყნის ენერგო დამოუკიდებლობაში და შუახევი ჰესი ამის ნათელი მაგალითია. ასევე, ტურიზმის მიმართულებით ჩვენ გვაქვს კონკრეტული გეგმები, რომლის განხორციელებაც უკვე დავიწყეთ. დარწმუნებული ვარ, თქვენი ღირსეული წარმომადგენლები, როგორც საქართველოს პარლამენტში, ასევე აჭარის უმაღლეს საბჭოში, კიდევ ერთხელ, უფრო მეტი პასუხისმგებლობით, უფრო მეტი რუდუნებით ბოლომდე მიიყვანენ ამ საქმეს. როგორც ჭვანა, ასევე ჩირუხი, გახდება ახალი ტურისტული მიზიდულობის ცენტრები შუახევში და მაღალმთიან აჭარას ექნება მეტი დინამიკა.
ჩვენ აუცილებლად დავასრულებთ გაზიფიცირებას. სულ რამდენიმე საათში, ჩვენს სტუმრებთან ერთად მოვინახულებთ ხულო-ზარზმის გზის უკვე მიმდინარე მშენებლობას და ეს იქნება მაღალმთიანი აჭარისთვის ახალი პერსპექტივა. ჩვენ ბევრი გამოწვევა, ბევრი ბრძოლა მოგვიწია, რომ დღეს უკვე ის გზა ყოფილიყო მიმდინარე მშენებლობის ეტაპზე და როგორც ძალიან ბევრი სხვა დაპირება, ესეც იქნება შესრულებული.
მადლობა მინდა გადაგიხადოთ გვერდში დგომისთვის და მოველით, რომ თქვენ მაჟორიტარ კანდიდატებს ექნებათ ძალინ მაღალი ნდობა შუახევში“,- განაცხადა რიჟვაძემ.