რუსეთი თურქეთს მოუწოდებს, ცეცხლზე ნავთი არ დაასხას და მთიან ყარაბაღში მშვიდობის მისაღწევად იმუშაოს. ამის შესახებ კრემლის ოფიციალურმა წარმომადგენელმა, დიმიტრი პესკოვმა განაცხადა.
„საბრძოლო ქმედებები მალე უნდა შეწყდეს. ნებისმიერი განცხადება სამხედრო მხარდაჭერის ან სამხედრო აქტიურობის თაობაზე ცეცხლზე ნავთის დასხმის ტოლფასია. ჩვენ კატეგორიულად ვეწინააღმდეგებით ამას და საკითხის ამგვარად დაყენებას არ ვეთანხმებით. ყველა ქვეყანას, განსაკუთრებით ჩვენს პარტნიორებს, როგორიც არის თურქეთი, მოვუწოდებთ, რომ ყველაფერი გააკეთონ იმისთვის, რომ მხარეებმა ცეცხლი შეწყვიტონ და კონფლიქტის პოლიტიკური და დიპლომატიური გზით გადაჭრას დაუბრუნდნენ“, – განაცხადა რუსეთის პრეზიდენტის პრესმდივანმა.
28 სექტემბერს თურქეთის პრეზიდენტმა განაცხადა, რომ კრიზისი რეგიონში, რომელიც სომხეთის მიერ მთიანი ყარაბაღის ოკუპაციით დაიწყო, უნდა დასრულდეს. რეჯეფ თაიფ ერდოღანმა ასევე განაცხადა, რომ თურქეთი განაგრძობს ძმური აზერბაიჯანის მტკიცე მხარდაჭერას.