გარეჯის თემა ყოველთვის იყო რეზონანსული საქართველო აზერბაიჯანის ურთიერთობაში. ზოგადად, ჩვენი საზოგადოებისთვის ეს საკითხი მნიშვნელოვანია. ამიტომაც ამ თემის გარშემო ახალი გარემოებების გამოვლენამ, რა თქმა უნდა დამატებითი რეზონანსი შესძინა მას, – ამის შესახებ ანალიტიკოსმა, ზაალ ანჯაფარიძემ „დღის ქრონიკაში“ განაცხადა.
მისი თქმით, სადემარკაციო-სადემილიტაციო კომისიის მუშაობის დროს, როგორც ჩანს, არ იქნა გამოყენებული ის რუკები, რომელზეც ორივე მხარე შეთანხმდა და რომლის თანახმადაც ის ტერიტორია, სადაც განლაგებულია დავით გარეჯის კომპლექსი, საქართველოს ტერიტორიაა.
„ძალიან ვფრთხილად გარეჯის საკითხზე მსჯელობას, იქიდან გამომდინარე, რომ არ მინდა ვინმეს უდანაშაულობის პრეზუმფცია დავარღვიო, მაგრამ იმ ინფორმაციის საფუძველზე, რაც უკვე საჯარო სივრცეში არსებობს და დადასტურებულია, როგორც მინიმუმ საქმე გვაქვს დანაშაულებრივ დაუდევრობასთან. იმიტომ, რომ სადემარკაციო-სადემილიტაციო კომისიის მუშაობის დროს, როგორც ჩანს, არ იქნა გამოყენებული ის რუკები, რომელზეც ორივე მხარე შეთანხმდა და რომლის თანახმადაც ის ტერიტორია, სადაც განლაგებულია დავით გარეჯის კომპლექსი, არის საქართველოს ტერიტორია. აქედან გამომდინარე წარმოიშვა ეჭვები ახალი დოკუმენტების მოძიების კვალობაზე. პროკურატურის განცხადებას თუ ყურადღებით წავიკითხავთ, ვნახავთ, რომ იქ არის დანაშაულის ნიშნები და იმიტომაც დაიწყო გამოძიება. ეს ასე რომ არ ყოფილიყო პროკურატურა გამოძიებას არ დაიწყებდა. აქედან გამომდინარე, ჩვენ უნდა ვიფიქროთ ის, რომ ამ საქმეში არის ის გარემოებები, რომელიც აძლევს საფუძველს პროკურატურას, რომ ეძებოს საქართველოს კანონმდებლობის დარღვევას“, – განაცხადა ზაალ ანჯაფარიძემ.