“ნარტიკმა დაამარცხა ლეიკემია და დღეს გავაცილეთ სოხუმში, ჩემს, ჩვენს აფხაზეთში! გავატანეთ სითბო და სიყვარული!
უდიდესი მადლობა იაშვილის კლინიკის მედპერსონალს” – წერს სოციალურ ქსელში დედა თინათინ ჩხვიმიანი, ბერი ანდრიას დედა და მისი სახელობის ფონდის დამაარსებელი, რომელიც სოლიდური სიმსივნით დაავადებულ ბავშვებს მფარველობს და მკურნალობს.
როგორც დედა თინათინმა გვითხრა, 4 წლის ნარტი წელიწადისა და სამი თვის მანძილზე მკურნალობდა. მისი, ისევე როგოც სხვა დანარჩენი პატარას გამოჯანმრთელება, შვილის სულს შესთხოვა…
თინათინ ჩხვიმიანი: – ნარტი აფხაზეთიდან რომ ჩამოიყვანეს, ლეიკემიის რთული და მძიმე ფორმა ჰქონდა. მთელი მკურნალობა გადასარევად გადაიტანა. ბოლო ოთხი თვე კვლევების რეჟიმში იყო ჩვენთან და გვითხრეს, რომ მას შეუძლია სახლში დაბრუნდეს. ისე შევეჩვიე… გამოჯანმრთელდა და დღეს წავიდა სოხუმში.
ასეთ მძიმე დაავადებას რომ ამარცხებენ და მერე გამოჯანმრთელებულ ბავშვს ვხედავ, ისე მიხარია და ისე ძალიან ბედნიერი ვარ, ვერ წარმოიდგენთ.
მამა ანდრიას სულს შევთხოვ და ვლოცულობ მათი გამოჯანმრთელებისთვის. ახლობელს ხუმრობით ვუთხარი, ხან ამას ვთხოვ, ხან იმას ვთხოვ, იქაც არ ვასვენებ-მეთქი. დედა, იმას უშველე, დედა, შემეწიე, დედა, დაგვიფარე… სულ რაღაცას ვთხოვ მთელი გულით. დიდება უფალს, ჩემი შვილი სასუფეველშია და მე კიდევ ისეთი შეგრძნება მაქვს, რომ იქაც არ ვასვენებ.
და როცა უკვე გამოჯანმრთელებულ ბავშვს სახლში ვუშვებთ, ყოველთვის მაქვს გამარჯვების შეგრძნება. ვთვლი, რომ მე და მამა ანდრიამ გავიმარჯვეთ.
წყარო: პრაიმტაიმი