ირანის ვიცეპრეზიდენტი და ატომური ენერგიის სააგენტოს ხელმძღვანელი ალი აკბარ სალეჰი კორონავირუსით დაინფიცირდა. ამის შესახებ ტელეკომპანია Al Arabia იტყობინება.
ამ დროისათვის სალეჰი საკუთარ სახლში კარანტინში იმყოფება. პანდემიის დაწყებიდან დღემდე ირანში Covid 19-ის 500 075 შემთხვევაა დადასტურებული. ვირუსმა ქვეყანაში 28 544 ადამიანი იმსხვერპლა, 406 389 კი გამოჯანმრთელდა.
ირანში ლეტალური შემთხვევების რეკორდული დღიური მაჩვენებელი დაფიქსირდა.
თეირანში, საჯარო სივრცეებში, მათ შორის, შენობებს გარეთაც, პირბადის ტარება სავალდებულო გახდა.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ მიიჩნია. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.