ამირან გამყრელიძე მოუწოდებს პოლიტიკოსებს, ამომრჩეველთან შეხვედრისას პირბადე ატარონ. ამის შესახებ დაავადებათა კონტროლის ეროვნული ცენტრის ხელმძღვანელმა საკოორდინაციო საბჭოს სხდომის დასრულების შემდეგ განაცხადა.
“თბილისში, ქუთაისში და სხვა დიდ ქალაქებში, სადაც დიდი თავშეყრის ადგილებია, რეკომენდებულია, გარდა დახურული შენობებისა, გარეთ, სადაც ვერ ვიცავთ დისტანციას, ვატაროთ პირბადე.
პირბადე, დისტანცია, ხელების დამუშავება – ეს არის მთავარი გზავნილები, რომლებიც მუდმივად უნდა იგზავნებოდეს მოსახლეობასთან და მოსახლეობა ამას უნდა მიყვებოდეს და რაც მთავარია, დიდი თავშეყრის, დიდი დღესასწაულების თავის არიდება.
იმავეს მოვუწოდებ მე პოლიტიკოსებსაც, მოგეხსენებათ, ახლა პოლიტიკური პროცესია ქვეყანაში, წინასაარჩევნო პერიოდია და მოვუწოდებ, იყოს უფრო ხშირი შეხვედრები გარე სივრცეში და იქაც ვიხმაროთ ყველამ პირბადე – როგორც თავად პოლიტიკოსებმა, ისე საზოგადოებამ, ვისაც ისინი ხვდებიან, რათა მეტი პრევენცია მოვახდინოთ ინფექციის გავრცელების,” – განაცხადა ამირან გამყრელიძემ.
ამირან გამყრელიძემ განაცხადა, რომ მსოფლიოს მასშტაბით ძლიერი ლოქდაუნებზე ქვეყნები არ მიდიან და მეტად ხდება წერტილოვანი შეზღუდვები.