ჯანდაცვის დეპარტამენტის საზოგადოებრივი ჯანმრთელობის დაცვისა და პროგრამების სამმართველოს უფროსის, ეკატერინე ადამიას განცხადებით, კორონავირუსის შემთხვევების მატების მიუხედავად, ჯანდაცვის სისტემა ეპიდემიოლოგიურ ვითარებას მართავს და პანიკის საფუძველი არ არსებობს.
მისივე თქმით, ქვეყანის მასშტაბით, კორონავირუსის სამართავად 44 დაწესებულებაა მომზადებული.
„ზოგადად, გარკვეული ვნებათაღელვა შეინიშნება მედიასაშუალებებში ეპიდსიტუაციის გაუარესებასთან ერთად. არის მცდელობა, დაძაბონ ქვეყანაში არსებული ფონი. ეს არის ძალიან ცუდი, ვინაიდან ვითარება არ არის ისეთი მძიმე, როგორც შეიძლება ზოგიერთმა მედიასაშუალებამ დასახოს და ასეთ დროს პირიქით, გამოვიწვიოთ პანიკა მოსახლეობაში, რისი საფუძველიც რეალურად არ არსებობს. ჯანდაცვის სისტემა სავსებით მზად არის ამ პროცესის სამართავად.
ქვეყანაში 44 კლინიკაა მომზადებული როგორც ცხელების, ასევე „კოვიდის“ შემთხვევების სამართავად. მომზადებულია პირველადი ჯანდაცვის დაწესებულებები და ისინი ბინაზე ონლაინრეჟიმში მართავენ პაციენტებს. ამდენად, ამ ეტაპისთვის პროცესი სრულიად მართულია, პანიკის საფუძველი ნამდვილად არ არსებობს. პირიქით, ეს ემსახურება მეტი დაძაბულობის შექმნას, პაციენტების დაშინებას და შიშის დათესვას მოსახლეობაში, რაც კარგ შედეგს არავის მოუტანს. სახელმწიფოს აქვს სრული რესურსი იმისთვის, რომ გაუმკლავდეს ამ პროცესს და მართოს „კოვიდი“ მთელს ქვეყანაში,“ – განაცხადა ეკა ადამიამ.