ინფექციური საავადმყოფოს დირექტორის, თენგიზ ცერცვაძის განცხადებით, საქართველო პანდემიას ახლა იმაზე უკეთ უმკლავდება, ვიდრე ეპიდემიის დასაწყისში. ამის შესახებ თენგიზ ცერცვაძემ მთავრობის ადმინისტრაციაში, პრემიერ-მინისტრთან შეხვედრის შემდეგ ისაუბრა.
მისივე თქმით, გაზაფხულზე ვირუსის მართვა შედარებით მარტივი იყო, რადგან ქვეყანაში ინფიცირების ერთეული შემთხვევები ფიქსირდებოდა, ახლა კი ლოკდაუნის გარეშე ყოველდღე ათასი პაციენტის მართვა გაცილებით რთულია.
„საქართველოს კლინიკებში 4 300 საწოლია მობილიზებული, რაც დღეისთვის საჭიროზე მეტია. რამდენიმე ასეული საწოლი არის თავისუფალი და არავითარი პრობლემა არ არსებობს იმისა, რომ ყველა პაციენტი, ვისაც სჭირდება ჰოსპიტალიზაცია, ამ მხრივ პრობლემა შეექმნას. თუკი ერთეული შემთხვევები არის და ამაზე მახვილდება ყურადღება, ზოგჯერ თავად პაციენტის,ზოგჯერ ჟურნალისტის, ზოგჯერ უბრალოდ ანგაჟირებული და ტენდენციური ადამიანების მხრიდან, დამიჯერეთ, ასეთი შემთხვევები გამონაკლისია, ერთეულია და არავითარ შემთხვევაში, ამ ერთეული შემთხვევის განზოგდება არ უნდა მოხდეს, რათა საზოგადოებაში მცდარი აზრი არ შეიქმნას, თითქოს ქვეყანა ცუდად უმკლავდება კოვიდპანდემიას. პირიქით, ვიტყოდი, ახლა უფრო კარგად უმკლავდება, ვიდრე დასაწყისში. მაშინ თუ უფრო ადვილი იყო მართვა, რადგან შემთხვევების რაოდენობა შედარებით ნაკლები იყო, თანაც მაშინ ქვეყანა მკაცრ შეზღუდვებზე, ჩაკეტვებზე, ლოკდაუნზე წავიდა. ისევე როგორც ევროპის ყველა ქვეყანა. ამან თავისი შედეგი გამოიღო, მაგრამ ახლა ლოკდაუნის გარეშე ყოველდღე ათასი პაციენტის მართვა ისე, რომ პაციენტების სიცოცხლეს საფრთხე არ შეექმნას, გაცილებით რთულია, ვიდრე გაზაფხულზე იყო“, – განაცხადა თენგიზ ცერცვაძემ.