„ლელო საქართველოსთვის” წევრმა, თენგიზ შერგელაშვილმა პარტია დატოვა, – ამის შესახებ მან Facebook-ის საკუთარ გვერდზე დაწერა.
„როდესაც „ლელო საქართველოსთვის” იქმნებოდა, ვიმედოვნებდი, რომ არსებული დაჭაობებული პოლიტიკური ლანდშაფტის ალტერნატიული ძალა შეიქმნებოდა. გაზაფხულიდან სულ უფრო იზრდებოდა აცდენები ჩემს ხედვებსა და პარტიის მიდგომებს შორის. ბოლო პერიოდში ფაქტობრივად გადაწყვეტილება მიღებული მქონდა, თუმცა, წინასაარჩევნო პერიოდში არ დავაჩქარე მოვლენები. დღეს მივმართე პარტიას მისი რიგების დატოვების შესახებ. მეტ კომენტარს ამ საკითხზე არ გავაკეთებ. სამომავლოდ შევეცდები, ჩემი მოკრძალებული წვლილი სხვა პლატფორმებიდან კვლავ შევიტანო ქვეყნის ამ ჭაობიდან ამოთრევაში“ – წერს თენგიზ შერგელაშვილი.
თენგიზ შერგელაშვილი 2014-2016 წლებში საქართველოს რეგიონული განვითარებისა და ინფრასტრუქტურის მინისტრის მოადგილე იყო. 2012-2014 წლებში იყო საქართველოს რეგიონული განვითარებისა და ინფრასრუქტურის მინისტრის პირველი მოადგილე. 2012 წელს საქართველოს განვითარების კვლევის ინსტიტუტში ხელმძღვანელობდა ეკონომიკურ ჯგუფს, სოფლის მეურნეობის ჯგუფსა და ადგილობრივი თვითმმართველობის ჯგუფს. 2001-2006 წლებში იყო „საქართველოს ახალგაზრდა ეკონომისტთა ასოციაციის“ გამგეობის თავმჯდომარე. 2002-2006 წლებში ის იყო საზოგადოებრივი განვითარების ინსტიტუტის საბჭოს თავმჯდომარე. 2001-2004 წლებში იყო გაეროს განვითარების პროგრამის, მსოფლიო ბანკისა და ღია საზოგადოების ინსტიტუტის ერთობლივი პროგრამის „ფისკალური დეცენტრალიზაციის ინიციატივა“ კონსულტანტი, მომხსენებელი. 2002 წელს ის იყო ბრიტანული ორგანიზაცია OXFAM-ის ეკონომიკური ზრდისა და სიღარიბის შემცირების პროგრამის ექსპერტი. 2000 წელს იყო საქართველოს სტრატეგიული კვლევისა და განვითარების ცენტრის ტრენერი. 1999-2002 წლებში იყო საქართველის ეკონომიკური განათლებისა და მეცნიერების საკოორდინაციო საბჭოს წევრი. 1999-2000 წლებში – ახალგაზრდა ეკონომისტთა ასოციაციის პროგრამის „საქართველოში ადგილობრივი თვითმმართველობის განვითარების ხელშეწყობა“ დირექტორი (წყარო: საქართველოს ახალგაზრდა ეკონომისტთა ასოციაცია).