რვა საათამდე ივანიშვილმა გადააყენოს ჟვანია და მზად ვართ, შევხვდეთ ივანიშვილს ახალი არჩევნების ჩატარების თაობაზე, – ამის შესახებ პარლამენტის წინ მიმდინარე აქციაზე, „ნაციონალური მოძრაობის“ გლდანის მაჟორიტარობის კანდიდატმა, ნიკა მელიამ განაცხადა.
მისი თქმით, „უკან დასახევი გზები ჩახერგილია“.
„საღამოს რვა საათამდე ჩამოყალიბდეს ივანიშვილი, გადააყენოს ჟვანია, ქალბატონი გამყალბებელი და თქვენის სახელით, ოპოზიციის წარმომადგენლები მზად ვართ, შევხვდეთ ივანიშვილს ახალი არჩევნების ჩატარების თაობაზე. ივანიშვილო, საქართველოს არის ეს, საქართველო არ ხარ შენ. შენ ხარ უზურპატორი და უზურპატორი წავა და თუ არ წავა, გაგიშვებთ. უკან დასახევი გზები ჩახერგილია. ყველაფერი ფარსი, ფლიდობა და თვალთმაქცობა იქნება, თუ ჩვენ თავზე ლაფის დასხმას, ღირსების აყრას, დამცირებას ჩვენი შვილების, ჩვენი დედების, ჩვენი მშობლების, რაც მან აკადრა 31 ოქტომბერს, შევუშინდებით და არ წავალთ ბრძოლაში წინ. რვა საათამდე ბატონ ივანიშვილს აქვს დრო. მოიფიქრებს, მოიფიქრებს, არ მოიფიქრებს, ამის შემდეგ ჩვენ გაცნობებთ ჩვენს გადაწყვეტილებას და აუცილებლად, მტკიცედ და მშვიდად, ამ ქვეყნის სიყვარულით და მეტი არაფრით ვიმოქმედებთ ბოლომდე, უკანასკნელ ამოსუნთქვამდე. მადლობა, რომ არსებობთ. მადლობა, რომ გული გიძგერთ ამ ქვეყნის სიყვარულით და ღალატი იქნება ჩვენი მხრიდან თქვენთვის ზურგის ქცევა“, – განაცხადა მელიამ.