„ოპოზიციის პოლიტიკური უპასუხისმგებლობა ქვეყანას ეპიდემიოლოგიურად ძვირი დაუჯდება და, შესაძლოა, საქართველოში “იტალიური სცენარი” მივიღოთ”, – ამის შესახებ ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ განაცხადა.
ხუნდაძის თქმით, საკოორდინაციო საბჭო ცდილობს, მაქსიმალური დატვირთვა აარიდოს ჯანდაცვის სექტორს, ხოლო უპასუხისმგებლო ოპოზიცია საკუთარ მომხრეებს სამსხვერპლოზე უშვებს.
„ოპოზიცია საზოგადოებას ფინალურ აურზაურს სთავაზობს, თანაც იმ დროს, როცა საქართვ ელო დანარჩენ მსოფლიოსთან ერთად კორონავირუსს მისი გავრცელების მეორე ტალღის პიკურ ფაზაში ებრძვის.
საკოორდინაციო საბჭო ცდილობს მაქსიმალური დატვირთვა აარიდოს ჯანდაცვის სექტორს, რომელიც, პრაქტიკულად, ბრძოლის წინა ხაზს წარმოადგენს. მობილიზება უკეთდება სამედიცინო ინსტიტუტის სტუდენტებს, არა მომუშავე მედპერსონალს, რომ დაეხმარონ მოქმედ ექიმებს პაციენტების მართვაში. პოლიცია მაქსიმუმს აკეთებს, ზიანის გარეშე დაიცვას წესრიგი. მობილიზება უკეთდება ქვეყანაში მარაგებს. აქტიური კომუნიკაციაა საერთაშორისო საფინანსო ინსტიტუტებთან ფინანსების მოსაზიდად. მიმდინარეობს მუშაობა შესაძლო ვაქცინის უსწრაფეს შემოტანაზე ქვეყანაში. უპასუხისმგებლო ოპოზიცია კი დესტრუქციის გზით ხელისუფლებაში დაბრუნების ცდუნებით სამსხვერპლოზე უშვებს საკუთარ მომხრეებს, რომლებიც რამოდენიმე დღეში საკუთარი თავის და უმრავლესობის ეპიდემიოლოგიურ საფრთხედ წარმოჩინდება. მათი უსაფუძვლო მოთხოვნა კი, ვადამდელი არჩევნების ჩატარების თაობაზე, მითუმეტეს, პანდემიის გამწვავების ფაზაში, შესაძლოა “იტალიური სცენარის” საფუძველი გახდეს. ჩვენი ქვეყანა ამას ვერ გაუძლებს”, – განაცხადა დიმიტრი ხუნდაძემ.
მისივე თქმით, საჭიროა ქუჩის პროცესების მოლაპარაკებების მაგიდასთან გადატანა და ადეკვატური შეზღუდვების შემოღება.
„ეს რომ თავიდან ავიცილოთ, საჭიროა ქუჩიდან პროცესების მოლაპარაკების მაგიდასთან გადატანა. ქვეყნის ბედი და ხვალინდელი დღე არ შეიძლება “დისკოთეკაზე” წყდებოდეს.
საჭიროა ადეკვატური შეზღუდვების შემოღება, რასაც ამ რთულ პერიოდში ქვეყნების უმრავლესობა მიმართავს.
სასიცოცხლოდ მნიშვნელოვანია პოლიტიკური სტაბილურობა და წესრიგი. წინააღმდეგ შემთხვევაში, პოლიტიკური გემოვნების მიუხედავად, შესაძლოა ნებისმიერი ადამიანის სიცოცხლე საფრთხის წინაშე აღმოჩნდეს”,- განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ.