ქართველმა მენეჯერმა ირაკლი ხვედელიანმა სოციალურ ქსელში გამოაქვეყნა პოსტი, სადაც ამტკიცებს, რომ სოხუმში არსებული საფეხბურთო კლუბის, სოხუმის „დინამოს“ (ამ სახელით კლუბი საქართველოში თამაშობს) პრეზიდენტს, ასტამურ ადლეიბას ელაპარაკა, რომელიც თანახმაა, რომ საქართველოში ამხანაგური მატჩი ჩაატაროს.
„2020 წლის 4 დეკემბერს შუამავლის მეშვეობით დამიკავშირდნენ ოკუპირებული აფხაზეთიდან, კერძოდ საფეხბურთო კლუბ სოხუმის „დინამოს“ პრეზიდენტი, ასტამურ ადლეიბა. მას სურს კლუბი ამხანაგურად დაუპირისპირდეს „დინამო თბილისს“ ან ეროვნული ლიგის სხვა მოწინავე კლუბს. იგი მზაობას გამოთქვამს მოიძიოს ფინანსური რესურსები, ჩაიყვანოს საკუთარი გუნდი თურქეთში და საწვრთნელ-მოსამზადებელიშეკრების პერიოდში ეროვნული ლიგის წარმომადგენელ კლუბთან საკონტროლო თამაში ჩაატაროს. მან მომმართა თხოვნით, რომ დავხმარებოდი საორგანიზაციო კუთხით და მხარი დამეჭირა მსგავსი თამაშის ჩატარების პერსპექტივისათვის. გავცვალეთ მოსაზრებები, სადაც მკაფიოდ დავაფიქსირე ჩემი პოზიცია და გავაცანი ჩემი პირობაც, რომლის დაცვის შემთხვევაშიც სამომავლოდ სრულ მხარდაჭერას აღვუთქვამ მსგავსი ტიპის შეხვედრებს!“, – წერს ირაკლი ხვედელიანი.
მისი თქმით, პირობა ასეთია: „თამაშამდე რამდენიმე დღით ადრე უნდა დაანონსდესმატჩის ჩატარების ზუსტი დრო და ადგილი. მატჩის მონაწილე ორივე გუნდმა უნდა გაავრცელოს შესაბამისი განცხადება, რომ აღნიშნული საფეხბურთო მატჩი აღქმული უნდა იყოს, როგორც ქართველი და აფხაზი ხალხის დაახლოების/შერიგების ერთ-ერთ პირველ ნაბიჯად. ორივე მხარემ უნდა მოაწეროს ხელი მემორანდუმზე, რომლის თანახმადაც აქცენტი გადატანილი იქნება ქალაქებზე, პირობითად – სოხუმსა და თბილისზე. ორივე მხარე აიღებს პასუხისმგებლობას და ყველაფერს გააკეთებს იმისათვის, რათა ეს მატჩი არ გახდეს პროვოკაციული შინაარსის გზავნილების წინაპირობა და არ იქნება აღქმული, როგორც ორი სხვადასხვა ქვეყნის წარმომადგენლის შეხვედრა. ხოლო ასეთი შინაარსის „მესიჯებს“ ორივე მხარე პასუხად გასცემს იმას, რომ ეს იყო ორი სხვადასხვა ქალაქის და არა ორი სხვადასხვა ქვეყნის გუნდს გამართული ამხანაგური თამაში!“.
ხვედელიანი აცხადებს, რომ ამხანაგური შეხვედრის ჩატარებაზე გავლენას კორონავირუსით გამოწვეული ვითარება განაპირობებს: „სოხუმის „დინამოს“ პრეზიდენტმა საუბრის ბოლოს აღნიშნა, რომ ხსენებულ საკითხს პანდემიური სიტუაციის დასტაბილურების შემდეგ აუცილებლად დაუბრუნდება. აფხაზეთი და სამაჩაბლო საქართველოა! ნაბიჯ-ნაბიჯ, ყოველდღიურ რეჟიმში, დავდოთ თითო აგური ერთიანი საქართველოსთვის!“.