გუშინ მოვახერხეთ, მიგვეღწია პროგრესისთვის, დღესაც ამ მიმართულებით ვაპირებთ მუშაობას, – ამის შესახებ საქართველოში ევროკავშირის ელჩმა, კარლ ჰარცელმა „ქართული ოცნებისა“ და ოპოზიციის წარმომადგენლების მორიგი შეხვედრის შესახებ განაცხადა.
კარლ ჰარცელი აღნიშნავს, რომ ოპტიმისტურადაა განწყობილი და მზად არის მოლაპარაკების იმდენი რაუნდისთვის, რამდენიც საჭირო იქნება.
„ვფიქრობ, გუშინ საერთო ჯამში კარგი განხილვა გვქონდა. ჩვენ მოვახერხეთ, შევხებოდით ყველა საკითხს, რაც დიალოგის ფარგლებში განიხილება. ასევე მოვახერხეთ, მიგვეღწია პროგრესისთვის გაგების გაღრმავებაში. დღესაც ამ მიმართულებით ვაპირებთ მუშაობას. გავაგრძელებთ იმის დანახვას, რამდენად შორს შეგვიძლია წასვლა საერთო პლატფორმის მიმართულებით. სწორედ ამ მიმართულებით გავაგრძელებთ ჩვენ, ფასილიტატორები მუშაობას პარლამენტის გახსნამდე ბოლო რამდენიმე დღის განმავლობაში.
აბსოლუტურად ოპტიმისტურად ვარ განწყობილი. მე ვფრთხილობ, ეს იქნება ყველასთვის მძიმე გადაწყვეტილებები, ყველამ გადადგა ნაბიჯები და ვნახავთ, რას მივაღწევთ. როგორც ვთქვი, ეს იქნება რთული, მოითხოვს ლიდერობას და პასუხიმგებლობას, რომ მივიდეთ დასახულ ადგილამდე.
მზად ვარ იმდენი მოლაპარაკების რაუნდისთვის, რამდენიც საჭირო იქნება, ვიდრე არ ვნახავთ, რომ პროგრესი გვაქვს. მაგრამ ძალიან ადრეა იმის თქმა, რას მოიტანს ხვალინდელი დღე“, – განაცხადა კარლ ჰარცელმა.