გასაოცარია, ამ დღეებში რაც გვესმის დიპლომატების შესახებ, როგორ დაჟინებით და ფანტაზიით ხდება არგუმენტირება. არც ერთ დიპლომატს საკუთარი თავი ძალით არ შეუთავაზებია და ეს არც მომავალში მოხდება. ჩვენ ისევ და ისევ მოგვმართავდნენ ოპოზიციური პარტიები გასული წლების განმავლობაში, გვეუბნებოდნენ, რომ ჩვენ ვართ პროდასავლური ოპოზიცია და თქვენ დიპლომატებმა უნდა დაგვეხმაროთ, – ამის შესახებ საქართველოში გერმანიის ელჩმა ჰუბერტ ქნირშმა „იმედთან“ ინტერვიუში განაცხადა.
მისი თქმით, დასავლური იდეა გამოიხატება არა ერთ პარტიაში ან ერთ პიროვნებაში, არამედ ის კონსტიტუციის შესაბამისი მმართველობის და თავისუფლების იდეაა.
„ამიტომ საქართველომ სააკაშვილის მმართველობის შემდეგ საპარლამენტო სისტემა შემოიღო. ამიტომ არის პარლამენტი ასეთი მნიშვნელოვანი და ამიტომ გააქტიურდნენ დიპლომატები, რათა შემდგარიყო მოლაპარაკებები პარტიებს შორის, რომლებიც წინ წაიყვანს საქართველოს დემოკრატიულ განვითარებას.
არ მინდა ვისაუბრო თითოეულ პირზე და მათ გამონათქვამებზე. ვინც საუბრობს, საკუთარ თავს თავად ახასიათებს და საზოგადოებას შეუძლია ამ გამონათქვამების შეფასება.
მე და ბევრ ჩემ კოლეგას სურვილი გვქონდა, რომ 31 ოქტომბრის არჩევნების შემდეგ პროცესები უფრო ადვილად და იოლად განვითარებულიყო. არჩევნებს წინ უძღვოდა საკონსტიტუციო ცვლილება და პარტიებს შორის მოლაპარაკების პროცესი, რომელიც გაადვილებული იყო დიპლომატების ჩართულობით და მე ჩემს კოლეგებთან ერთად ვმონაწილეობდი მასში~, – განაცხადა ჰუბერტ ქნირშმა.
მისივე თქმით, პარტიები შეთანხმდნენ უკეთეს სააჩევნო სისტემაზე, რომელიც ამომრჩევლის ნებას უკეთესად და უფრო ზუსტად ასახავს.
„ამ სისტემის მიხედვით არჩევნები ჩატარდა. უფრო მეტი ოპოზიციური პარლამენტი იქნა არჩეული პარლამენტში ოპოზიცია მთლიანობაში გაძლიერდა და მე მგონია, რომ ასეთი სახით პარლამენტი უკეთ ასახავს ამომრჩეველთა ნებას, ვიდრე ეს იქნებოდა ძველი სიტემით ჩატარებული არჩევნების შემთხვევაში. ამგვარად საქართველომ ჩააბარა დემოკრატიის ტესტი. რა თქმა უნდა, ეს არჩევნები არ იყო განვითრების მწვერვალი, საქართველოში დემოკრატიული განვითარების მწვერვალი. მე მგონია, რომ აქ აუცილებელი შემდგომი გაუმჯობესება და ამის შეგნება არსებობს როგორც ოპოზიციურ პარტიებში, ასევე მმართველ პარტიაში. გაუმჯობესება, რეფორმები აუცილებელია, მაგრამ სხვაგან სად, თუ არა პარლამენტში უნდა მოხდეს მათ შესახებ გადაწყვეტილებების მიღება“- განაცხადა გერმანიის ელჩმა.