საზოგადოებრივი მაუწყებლის სამეთვალყურეო საბჭოს წევრი, ბონდო მძინარაშვილი, სოციალურ ქსელში შემდეგ პოსტს აქვეყნებს:
„ხალხი 20 წელზე მეტია, პოლიტიკაშია და ელემენტარულ საკითხებში ვერ ერკვევა.
ელჩების დადანაშაულებას ვგულისხმობ.
ელჩი წარმოადგენს ამა თუ იმ სახელმწიფოს ამ ქვეყანაში.
მაგალითად, განვიხილოთ კელი დეგნანის სტატუსი.
კელი დეგნანი არის ამერიკის შეერთებული შტატების საგანგებო და სრულუფლებიანი ელჩი საქართველოში.
შესაბამისად, კელი დეგნანი საქართველოში წარმოდგენს ამერიკის შეერთებულ შტატებს.
შესაბამისად, კელი დეგნანი ცდილობს, საქართველოში გაატაროს ამერიკის შეერთებული შტატების ინტერესები და არავითარ შემთხვევაში, – პირიქით.
კელი დეგნანის ყველა ნაბიჯი შეთანხმებულია ვაშინგტონთან, ამერიკის შეერთებული შტატების სახელმწიფო დეპარტამენტთან, შესაბამის კურატორთან.
დღეს ამერიკის შეერთებული შტატების (ევროკავშირისაც, – ცალკე რომ არ ავხსნათ!) ინტერესია, რომ საქართველოში დესტაბილიზაციამ ხელი არ შეუწყოს კონტრდემოკრატიულ პროცესებს და არ დაზიანდეს ამერიკის (ევროკავშირის) გრძელვადიანი გეგმები რეგიონში და საკუთრივ, საქართველოში.
მგონი, ადვილად გასაგებია.
არჩევნებში “ქართული ოცნების” დამარცხების შემთხვევაში კელი დეგნანი დაიკავებდა ზუსტად იმ პოზიციას, რა პოზიციაც დაიკავა რიჩარდ ნორლანდმა 2012 წელს, როცა “ნაციონალური მოძრაობა” საპარლამენტო არჩევნებში დამარცხდა: დესტაბილიზაციას არ დაუშვებდა მოქმედი ხელისუფლების სასარგებლოდ!
ასევე არ დაუშვებდა დესტაბილიზაციას ოპოზიციის სასარგებლოდ!
არც კელი დეგნანი დაუშვებს დესტაბილიზაციას ახლა ოპოზიციის სასარგებლოდ!
იმიტომ, რომ დესტაბილიზაცია საქართველოში და მთლიანად რეგიონში სასარგებლო არ არის ამერიკის შეერთებული შტატებისთვის.
ძნელი გასაგებია?!
კელი დეგნანი არაფერს გააკეთებს “ქართული ოცნების” ან ოპოზიციის სასარგებლოდ, – ეს არ არის მისი მიზანი, მისი ამოცანა და მისი საქმე!
კელი დეგნანის საქმეა ამერიკის ინტერესების დაცვა, – ამას ითვალისწინებს მისი სამსახური და მისი სტატუსი!
ჰოდა, რას ითხოვთ მისგან?!
რა უნდა გააკეთოს და რა უნდა თქვას, – “ქართული ოცნება” აიძულოს, რომ ხელისუფლება ოპოზიციას გადასცეს?!
და ამ შემთხვევაში მისი ქმედება არ იქნება ქვეყნის სუვერენიტეტის დარღვევა და საშინაო საქმეებში უხეში ჩარევა?!
კიდევ ერთხელ ვიტყვი:
2012 წელს რიჩარდ ნორლანდმა არ დაუშვა დესტაბილიზაცია საქართველოში.
არ დაუშვებდა იმ შემთხვევაშიც, “ნაციონალურ მოძრაობას” უმრავლესობა რომ შეენარჩუნებინა. არ დადგებოდა “ქართული ოცნების” მხარეს!
2020 წელს კელი დეგნანი არ დაუშვებს დესტაბილიზაციას საქართველოში.
არ დაუშვებს ამ შემთხვევაში, როცა “ქართულ ოცნებას” უმრავლესობა აქვს და არ დაუშვებდა იმ შემთხვევაშიც, თუკი მანდატების უმრავლესობას ოპოზიცია მოიპოვებდა!
იმიტომ კი არა, რომ კარგი ან ცუდი ადამიანია, არც იმიტომ, რომ ვუყვარვართ ან არ ვუყვარვართ, არამედ იმიტომ, რომ მან ზუსტად იცის, ვისაც წარმოადგენს და ვისი ინტერესები უნდა დაიცვას საქართველოში!
ამერიკის, ევროკავშირის, გერმანიის, დიდი ბრიტანეთის, საფრანგეთის და სხვა ქვეყნების ელჩები თუ საერთაშორისო ორგანიზაციების წარმომადგენლები იმ ქვეყნების თუ ორგანიზაციების ინტერესებს ატარებენ და გაატარებენ, რომელ ქვეყნებსაც და ორგანიზაციებსაც წარმოადგენენ საქართველოში!
სულ ეს არის!
და თავი დაანებეთ ელჩების ლანძღვას!“ – წერს ბონდო მძინარაშვილი.