გადაცემაში „ბიზნესი იმედზე“ ეკონომიკისა და მდგრადი განვითარების მინისტრმა ნათია თურნავამ, მიმდინარე, გამოწვევებით სავსე 2020 წელი შეაჯამა და მომავალი წლის გეგმებზე ისაუბრა. აღნიშნა, რომ 2019 წელი მაკროეკონომიკური მაჩვენებლების მიხედვით ერთ-ერთი ყველაზე წარმატებული წელი იყო და სწორედ ეს გახდა პანდემიასთან წარმატებულად გამკლავების წინაპირობა.
„2020 წელს დავაგროვეთ გარკვეული მარაგი, რომ უფრო გამძლე ყოფილიყო ჩვენი ეკონომიკა თუმცა ძალიან მნიშვნელოვანი იყო მთავრობის მენეჯერული უნარი, კრიზისის მართვის უნარი და შეიძლება ითქვას, რომ ჩვენ ამ გამოწვევას თავი გავართვით“ – ეკონომიკისა და მდგრადი განვითარების მინისტრმა ყურადღება გაამახვილა ქვეყნის საინვესტიციო გარემოს ხელმისაწვდომობაზე, რაც არაერთხელ დადასტურდა სხვადასხვა საერთაშორისო კვლევაში და რეიტინგში. შეგახსენებთ, აშშ-ის სახელმწიფო დეპარტამენტის ანგარიშს სადაც საქართველო დასახელებულია ერთ-ერთ ყველაზე მიმზიდველ რეგიონად ინვესტიციებისთვის, „ოისიდის“ ბოლო შეფასებით საქართველო 82 ქვეყანას შორის მე-8 ადგილზეა საინვესტიციო გარემოს მიმზიდველობის თვალსაზრისით.
2021 წლიდან სახელმწიფოს მთავარ პრიორიტეტულ მიმართულებებად სახელდება: უცხოური და შიდა ინვესტიციების ხელშეწყობა, მაკროეკონომიკური სტაბილურობის აღდგენა, ეკონომიკის დივერსიფიკაცია და საინვესტიციო ეფექტიანობისკენ მიმართული რეფორმების განხორციელება, საკანონმდებლო, აღმასრულებელი და მონეტარული პოლიტიკის მიმართულებით.
„ჩვენი საინვესტიციო გარემო, მიუხედავად პანდემიისა რჩება ერთ-ერთ ყველაზე მიმზიდველად და შეიძლება ზუსტად პანდემიის გამოც. იმიტომ, რომ პანდემია ეს არის უდიდესი გამოწვევა, მაგრამ ეს არის ახალი შესაძლებლობა. კომპანიები გლობალურად ეძებენ ახალ დასაყრდენს“. – მინისტრმა მომავალი წლისთვის ერთ-ერთ მთავარ გადასაჭრელ საკითხად უმუშევრობა დაასახელა და აღნიშნა, რომ დასაქმებაზე ორიენტირებული ინვესტიციების მოზიდვა ქვეყნის მთავარ პრიორიტეტად რჩება. მისივე თქმით, 2021 წელს მთავრობის და საერთაშორისო პარტნიორების მოლოდინები ოპტიმისტურია.
„საერთაშორისო სავალუტო ფონდის შეფასებით მომავალ წელს ჩვენ გვექნება 4,3 % ზრდა ეკონომიკაში, ხოლო საშუალოვადიან პერსპექტივაში კვლავაც ლიდერები ვიქნებით ეკონომიკური ზრდით რეგიონში და 5%-ზე მეტი ზრდა გვექნება და რაც მთავარია დასაქმება, დასაქმება და კიდევ ერთხელ დასაქმება“. – განაცხადა, ნათია თურნავამ.