დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ერთდროულად ყველა შეზღუდვის მოხსნა ქვეყანაში ეპიდემიოლოგიურ მდგომარეობას გააუარესებს.
გამყრელიძე მიიჩნევს, რომ შეზღუდვები ეტაპობრივად უნდა შემსუბუქდეს.
„დღეს რომ ქვეყანაში ერთბაშად ყველა შეზღუდვა მოიხსნას, ერთი თვის შემდეგ ჩვენ დავუბრუნდებით დაახლოებით იგივე მაჩვენებლებს, რაც გვქონდა ოქტომბერ-ნოემბერ-დეკემბერში. ძალიან მძიმე ტალღა გამოვიარეთ და არ გვინდა, ის ტალღა გადავიტანოთ. ქართველებს კარგი გამონათქვამი გვაქვს, სიფრთხილეს თავი არ სტკივაო. ფრთხილად უნდა ვიაროთ. ყველა მომხრეა, რომ შეზღუდვები არ იყოს, ან იყოს ძალიან ნაკლები, მაგრამ შეზღუდვების შემსუბუქება უნდა მოხდეს თან და თან და იყოს დაკვირვება და ეპიდსიტუაციაზე მონიტორინგი. ყველა შეზღუდვა უნდა მოხდეს მონიტორინგის საფუძველზე. ამაზე ბევრი მსჯელობა მიმდინარეობდა საკოორდინაციო საბჭოზე. მოგეხსენებათ, რესტორნებში გარდა შეკრებისა, იქ სხვა რისკია. როდესაც მივირთმევთ ალკოჰოლს, მერე შეაძლებელია ბევრი ახლო კონტაქტი იყოს, აღარ მოვყვები. კიდევ ერთხელ ვამბობ, რესტორნებიც გაიხსნება, სხვა ბიზნესიც გაიხსნება, გარკვეული რიგითობით“, – განაცხადა გამყრელიძემ.