ზემო ფონიჭალაში მდებარე №206 საბავშვო ბაღსა და გლდანის I მ/რ-ში, ბოჭორიშვილის ქუჩაზე მდებარე №35 საბავშვო ბაგა-ბაღში ბავშვების რეგისტრაცია იწყება.
რეგისტრაცია 16 მაისს, 12:00 საათზე დაიწყება და მსურველებს მისი გავლა თბილისის ბაგა-ბაღების მართვის სააგენტოს ვებ-გვერდზე www.kids.org.ge შეეძლებათ. №206 საბავშვო ბაღი 260 ბავშვს მიიღებს, №35 ბაღში დარეგისტრირებას კი 350 პატარა შეძლებს. აღნიშნული ბაგა-ბაღებისთვის კადრების შერჩევა დაწყებულია. ბაღები, ძირითადად, საკადრო რეზერვის შესაქმნელად გამოცხადებული კონკურსის გზით შერჩეული კადრებით, ასევე, სხვა ბაღებიდან გადმოყვანილი კვალიფიციური პერსონალით დაკომპლექტდება.
მერიის ინფორმაციით, №206 საბავშვო ბაგა-ბაღი ერთ-ერთია იმ მრავალრიცხოვანი ბაღებიდან, რომლებიც გასულ წლებში დაიხურა. მისი აღდგენა-რეაბილიტაცია სააგენტომ გასულ წელს შეძლო. რაც შეეხება №35 საბავშვო ბაღს, ის 2015 წელს, განსაკუთრებით გაზრდილი მოთხოვნის გათვალისწინებით აშენდა. ორივე საბავშვო ბაღი თანამედროვე სტანდარტების გათვალისწინებით მოეწყო და აღიჭურვა.გარდა ზემოთაღნიშნული ბაღებისა, წლის განმავლობაში თბილისში კიდევ 4 ახალი ბაღის გახსნა იგეგმება. ამასთან, წელს დედაქალაქში 10 ბაღის მშენებლობა დაიწყება.