Standard & Poor’s-ის ანგარიშში აღნიშნულია სტაბილური მაკროეკონომიკური გარემო, მთავრობის მიერ გატარებული რეფორმები, ეფექტური ანტიპანდემიური ღონისძიებები, რეფორმების კურსისადმი ერთგულება – ეს არის საფუძველი, რომელიც მათ ძველი რეიტინგის შენარჩუნების საშუალებას აძლევს, – ასე გამოეხმაურა ეკონომიკის მინისტრი ნათია თურნავა სარეიტინგო სააგენტო S&P Global-ის მიერ საქართველოს სუვერენული საკრედიტო რეიტინგის „BB“ დონეზე შენარჩუნებას.
მისივე თქმით, ეს აამაღლებს საერთაშორისო ნდობას საქართველოს ეკონომიკური პოლიტიკის მიმართ.
„კიდევ ერთმა საერთაშორისო საკრედიტო სააგენტომ Standard & Poor’s-მა შეუნარჩუნა საქართველოს სუვერენული საკრედიტო რეიტინგი „BB“ დონეზე. ეს არის რეიტინგი, რომელიც პანდემიამდე გვქონდა. მოგეხსენებათ, რომ მანამდე სააგენტო Fitch-მაც იგივე გადაწყვეტილება მიიღო. ეს არის ძალიან მნიშვნელოვანი ინდიკატორი იმისა, რომ გლობალური პანდემიისა და მასთან დაკავშირებული სირთულეების მიუხედავად, სარეიტინგო სააგენტოები და შემდგომში უკვე უცხოელი ინვესტორებიც ენდობიან საქართველოში გატარებულ რეფორმებს და სამომავლო კურსის ურყეობას. Standard & Poor’s-ის ანგარიშში აღნიშნულია სტაბილური მაკროეკონომიკური გარემო, მთავრობის მიერ გატარებული რეფორმები, ეფექტური ანტიპანდემიური ღონისძიებები, რეფორმების კურსისადმი ერთგულება – ეს არის საფუძველი, რომელიც მათ ძველი რეიტინგის შენარჩუნების საშუალებას აძლევს. ეს აამაღლებს საერთაშორისო ნდობას ჩვენი ქვეყნისა და ჩვენი ეკონომიკური პოლიტიკის მიმართ“, – განაცხადა თურნავამ.
სარეიტინგო სააგენტო S&P Global-მა საქართველოს სუვერენული საკრედიტო რეიტინგი „BB” დონეზე შეუნარჩუნა – პანდემიისა და გლობალური ეკონომიკური კრიზისის მიუხედავად, სარეიტინგო კომპანია Fitch-ის შემდეგ, ეს უკვე მეორე სარეიტინგო სააგენტოა, რომელმაც ქვეყნის სუვერენული საკრედიტო რეიტინგი უცვლელ, „BB” დონეზე დატოვა.