ლეიკემია განაჩენი არ არის, თუმცა უმძიმესი დაავადებაა. ვისაც ჰქონია შეხება ლეიკემიით დაავადებულ პატარებთან, დამეთანხმება ეს პატარა არსებები, როგორი თბილები და განსაკუთრებულად სათუთები არიან.
მათი მთავარი სურვილი არის არ ტკიოდეთ და საავადმყოფოს კედლებს იქეთ ისევე ითამაშონ სხვა ბავშვებთან, როგორც მათი ჯანმრთელი თანატოლები.
ისინი ყოველ წელიწადს წერენ წერილებს თოვლის ბაბუას წერილებს და ამ სურვილების ასრულებაში ბევრი ადამიანი ეხმარებათ.
2013 წელს მათი მთავარი სურვილი იყო ბერა ივანიშვილთან შეხვედრა. თამთა დემურიშვილმა, რომელიც წლების მანძილზე აქტიურად იყო ჩართული ამ ბავშვების დახმარებაში, ბერას ფეისბუქის პირად გვერდზე გაუგზავნა ბავშვების წერილები, ბავშვები თოვლის ბაბუას ბერას გაცნობას სთხოვდნენ.
5 იანვარს ბერამ ბავშვებს სიურპრიზი მოუწყო და იაშვილის კლინიკაში ესტუმრა. მაშინ თვითონ 16 თუ 17 წლის იყო, სწორედ მისი ასაკის გიორგი კიკნაძე იწვა მაშინ იაშვილის კლინიკაში ერთ-ერთი და არ დამავიწყდება, ბერა როცა გიორგის პალატაში შევიდა და გაესაუბრა, იტირა ბერამ. გიორგი დღეს ჯანმრთელია და კარგად არის.
საჩუქრებიც მოუტანა ბავშვებს და მისი დისკებიც აჩუქა.
აქვე ვიტყვი, ტელევიზიების და ბეჭდური მედიის მხრიდან დიდი ინტერესი იყო, ამ ამბის გასაშუქებლად, მაგრამ ბერას სურვილი იყო არ გახმაურებულიყო.