თენგიზ ცერცვაძის თქმით, არც ერთ შემთხვევაში არ დადასტურდა, რომ ევროპაში დაფიქსირებული გართულებები AstraZeneca-ს ვაქცინის მიღებასთან იყო დაკავშირებული. თბილისის ინფექციური საავადმყოფოს დირექტორის თქმით, მსოფლიოში ამ პრეპარატით უკვე 16 მილიონი ადამიანი აიცრა და თრომბოემბოლია მხოლოდ 30 მათგანს განუვითარდა.
„პირველი ასეთი შემთხვევა დაფიქსირდა ავსტრიაში, შემდეგ დანიაში. იყო შემთხვევები იტალიაში და რამდენიმე ქვეყანამ დროებით შეაჩერა AstraZeneca-ს გამოყენება, თუმცა მხოლოდ იმის გარკვევამდე, სანამ სპეციალური კომისია გაარკვევდა თრომბოემბოლიის და გარდაცვალების შემთხვევები დაკავშირებული იყო თუ არა ვაქცინასთან. ამაზე ინტენსიურად იმუშავა ჯანმოს ვაქცინების უსაფრთხოების სპეციალურმა კომისიამ, ევროპის წამლის სააგენტომ და კიდევ არაერთმა ორგანიზაციამ. მათ უკვე გამოაქვეყნეს ოფიციალური დასკვნა. არცერთ შემთხვევაში არ დადასტურდა, რომ გართულებები დაკავშირებული იყო AstraZeneca-ს ვაქცინის მიღებასთან. გარდა იმისა, რომ ეს არ იყო დაკავშირებული პრეპარატთან, რაოდენობრივადაც მეტი არ იყო, ვიდრე არავაქცინირებულ მოსახლეობაში თრომბოემბოლიის შემთხვევები“, – განაცხადა ცერცვაძემ.
მისივე თქმით, AstraZeneca-ს ვაქცინა Pfizer-ზე არანაკლებ ხარისხიანია.
„ძალიან არ მომწონს ტენდენცია, რომ ზოგიერთები შეგნებულად ამბობენ, ვინაიდან პირველი Pfizer-ი უნდა შემოსულიყო, ჩვენ გვინდა Pfizer-ი, არ გვინდა AstraZeneca. ეს არის სუფთა სპეკულაცია, რადგან მსოფლიოში AstraZeneca თავისი ხარისხით არანაკლებ ფასობს Pfizer-ი და ის მეორე ვაქცინაციის შემდეგ 90%-იან დაცვას იძლევა კოვიდისგან, ხოლო პირველი დოზის შემდეგ 60%-იან დაცვას“, – განაცხადა ცერცვაძემ.
საქართველოში ვაქცინაცია 15 მარტიდან იწყება. AstraZeneca-ს ვაქცინის 43 200 დოზა მედპერსონალისთვის არის განკუთვნილი.