ცოტა ხნის წინ სოციალურ ქსელში გამოჩნდა პოსტი, რომლის ავტორიც, ხათუნა აზარაშვილი წერდა, რომ იპოვა თანხა და პატრონს ეძებდა.
მალევე გაირკვა, რომ ქალბატონმა საკმაოდ სოლიდური თანხის, 5100 ლარის პატრონი იპოვა, დეტალბზე კი „პრაიმტაიმს“ ესაუბრა.
„ნუცუბიძეზე ძაღლს ვასეირნებდი, რომ გავიარე, დავაკვირდი, ტროტუარზე აშკარად საფულე იყო. ავიღე, ვცდილობდი, რომ პატრონი მომეძებნა, თუმცა, ირგვლივ არავინ ჩანდა.
სახლში როგორც კი მივედი, მომენტალულად ძებნა დავიწყე. პოსტი Facebook-ზე დავდე და მეგობრებს გაზიარება ვთხოვე. მერე ერთ-ერთ ფარმაცევტულ კომპანიაში დავრეკე, (ბარათი საფულეში იყო), პერსონალური მონაცემები არ მითხრეს, მაგრამ ჩემი საკონტაქტო გადავეცი და 5 წუთიც არ იყო გასული, თანხის პატრონი დამიკავშირდა.
ძალიან გახარებული და გაკვირვებული იყო. ვერ ვიჯერებ, ასეთი ადამიანები რომ არსებობენო. ყველგან ეძებდა, არ იცოდა სად დაკარგა. როცა გავაცნობიერე, რომ დავკარგე, აღარც მჯეროდა, რომ ვიპოვიდიო. როგორც აღმოჩნდა, მას არავისთვის მიუმართავს.
იმ შემთხვევაში, თუ ვერ ვიპოვიდი, ვაპირებდი, პოლიციაში მისვლას და განცხადების დაწერას, რადგან ადამიანისთვის, რომელიც თანხას კარგავს, 1 დღეც კი მნიშვნელოვანია. წარმოვიდგინე, როგორ ნერვიულობდა.
სავარაუდოდ, ისიც ძაღლს ასეირნებდა, რა დროსაც თანხა დაკარგა. 1 საათში შევხვდები და გადავცემ. მიხარია, ძალიან ბედნიერი ვარ, რომ პატრონი ასე სწრაფად ვიპოვე.
1 წელი არ არის გასული, რაც კიბო დავამარცხე. ქიმიოთერაპიები, სხივები, ფაქტობრივად, 2 წელი ჯოჯოხეთურ გზას გავდიოდი. ასე რომ, მიმაჩნია, ადამიანის სიცოცხლეზე და ჯანმრთელობაზე მნიშვნელოვანი არაფერია. ფული რა არის, არაფერი. ფული რომც გჭირდებოდეს და არც გქონდეს, მთავარია, ადამიანობა, შემდეგ ყველა დაბრკოლებას გადალახავ“, – ამბობს ჩვენთან საუბრისას ხათუნა აზარაშვილი