„პატრიარქთან შეხვედრის მიზანი იყო მისი ინფორმირება, როგორ არის დაგეგმილი ვაქცინაციის პროცესი, რას მოიცავს ვაქცინაცია და რა რისკები და დადებითი შედეგები შეიძლება, ჰქონდეს მას მოქალაქეებისთვის“, – ამის შესახებ ჯანდაცვის მინისტრმა ეკატერინე ტიკარაძემ ჟურნალისტებს საპატრიარქოსთან განუცხადა.
„შეხვედრა მქონდა პატრიარქთან. შეხვედრის მიზანი იყო მისი ინფორმირება, თუ როგორია ქვეყანაში ეპიდვითარება და როგორ არის დაგეგმილი ვაქცინაციის პროცესი, რას მოიცავს ვაქცინაცია და რა რისკები და დადებითი შედეგები შეიძლება, ჰქონდეს მას მოქალაქეებისთვის. მათი მხრიდან აღქმულია ის პრობლემები, რომლებიც გლობალურად არსებობს კოვიდპანდემიასთან მიმართებით.
საპატრიარქო მიესალმება ყველა იმ გონივრულ ნაბიჯს, რომელიც ჯანდაცვის სამინისტროს მხრიდან გადაიდგმება მოქალაქეების უსაფრთხოების დასაცავად.
ჩვენ ასევე ვისაუბრეთ დეტალურად ნიღბის ტარების პროცესზე და მნიშვნელოვანია, რომ მოქალაქეებს ერთობლივად მოვუწოდოთ, რამდენად დადებითი შედეგის მომტანია ის სოციალური დისტანციის დაცვასთან ერთად. ასევე აღვნიშნეთ, რომ ვაქცინაციის პროცესი არის ნებაყოფლობითი, თუმცა ერთ-ერთი ყველაზე ეფექტური საშუალება, რომ საბოლოო ჯამში მსოფლიომ, ისევე როგორც საქართველომ დაძლიოს არსებული გამოწვევა“, – განაცხადა ეკატერინე ტიკარაძემ.