გარდაცვლილი ექთნის ოჯახი კლინიკის წინააღმდეგ. 27 წლის ქალის ნათესავები აცხადებენ, რომ მედიკოსს ჯანმრთელობის მდგომარეობის გართულების შემდეგ შესაბამისი სამედიცინო დახმარება დროულად არ გაუწიეს. ბრალდებას არ ეთანხმებიან კლინიკაში. თუ რამ გამოიწვია 18 მარტს აცრის შემდეგ, გვერდითი მოვლენა – ამას გამოძიება დაადგენს, კლინიკიდან ამოღებულია ყველა საჭირო დოკუმენტაცია.
ახალციხის კლინიკასთან ამ დრომდე საპატრულო პოლიცია და დაცვის პოლიციაა მობილიზებული. კლინიკასთან ცოტა ხნის წინ გარდაცვლილი მეგი ბაქრაძის ქმარი მივიდა, რასაც მცირე ფიზიკური დაპირისპირება მოჰყვა.
ახალციხის კლინიკაში მეგი ბაქრაძის და იმყოფებოდა, მისი თქმით, ის საავადმყოფოში გარდაცვლილი ექთნის პირადი ნივთებისა და დოკუმენტაციის წასაღებად მივიდა. ოჯახი გამოძიების დროულად ჩატარებას ითხოვს. მეგი ბაქრაძის ახლობლები კლინიკას არაკომპეტენტურობასა და დაგვიანებულ მკურნალობაში ადანაშაულებენ, მათივე თქმით, მეგი ბაქრაძეს კლინიკაში ვაქცინაციის ჩატარება აიძულეს, წინააღმდეგ შემთხვევაში კი სამსახურიდან გაგდებით დაემუქრნენ.
27 წლის ექთანი, რომელსაც ახალციხეში კორონავირუსზე აცრის შემდეგ მძიმე გვერდითი რეაქცია გამოუვლინდა, გარდაიცვალა.