დღეიდან, საქართველოში კორონავირუსის საწინააღმდეგო კიდევ ერთ ვაქცინას – Pfizer-ს ელოდებიან. 14 მარტს ჯანდაცვის მინისტრის მოადგილე თამარ გაბუნიამ “კურიერს” განუცხადა, რომ Pfizer-ის ვაქცინას, 22 მარტის კვირაში, თვის ბოლომდე უნდა ველოდოთ.
რა არის Pfizer-ი?
გერმანიის ბიოტექნოლოგიური კომპანია BioNTech-ის მიერ წარმოებული კორონავირუსის ვაქცინა Pfizer-ი, ოფიციალური ინფორმაციით, 95%-იანი ეფექტურობით ხასიათდება და მისი მოქმედების ხანგძლივობა, დაახლოებით, 6 თვემდე აღწევს.
Pfizer-ი, განსხვავებით სხვა ვაქცინებისგან, არის რიბონუკლეინის მჟავაზე (რნმ) დაფუძნებული ფორმულა. ის შეიცავს, როგორც ქიმიურ, ასევე ბუნებაში არსებულ ნივთიერებებს, მაგალითად, ცილებს. ამასთან, მწარმოებლის ოფიციალური გვერდზე გამოქვეყნებული მონაცემების მიხედვით, Pfizer-BioNTech-ის ვაქცინა არ შეიცავს ცოცხალ ვირუსს.
ვაქცინა რეკომენდებულია 16 წლის, ან მეტი ასაკის ადამიანებისთვის. ამ ეტაპზე, ვაქცინა არ არის განკუთვნილი 16 წლამდე ბავშვებისა და მოზარდებისთვის, ასევე, ფეხმძიმე ქალებისთვის.
Pfizer-ით ვაქცინაცია ორ ეტაპად კეთდება. პაციენტმა განმეორებითი აცრა 21 დღის შემდეგ უნდა გაიკეთოს.
რა შემთხვევაში არ უნდა აიცრათ Pfizer-ის ვაქცინით:
თუ ოდესმე გქონიათ მწვავე ალერგიული რეაქცია (ანაფილაქსია) ან დაუყოვნებლივი ალერგიული რეაქცია – მაშინაც კი, თუ ის არ იყო მწვავე – mRNA COVID-19 ვაქცინის რომელიმე ინგრედიენტზე (მაგალითად, პოლიეთილენგლიკოლი);
თუ თქვენ გქონიათ მწვავე ალერგიული რეაქცია (ანაფილაქსია) ან დაუყოვნებლივი ალერგიული რეაქცია – მაშინაც კი, თუ ის არ იყო მწვავე – ვაქცინის პირველი დოზის მიღების შემდეგ, არ უნდა მიიღოთ მეორე დოზა;
ალერგიული რეაქცია მწვავედ მიიჩნევა, როდესაც ადამიანს სჭირდება ეპინეფრინით ან EpiPen©- ით მკურნალობა, ან თუ მას დასჭირდა საავადმყოფოსთვის მიმართვა;
დაუყოვნებელი ალერგიული რეაქცია ნიშნავს რეაქციას ვაქცინაციიდან 4 საათში, ისეთი სიმპტომების ჩათვლით, როგორიცაა ჭინჭრის ციება, შეშუპება ან ხიხინი (სუნთქვის გართულება).
რა გვერდითი მოვლენები შეიძლება განვითარდეს Pfizer-ის ვაქცინით აცრისას:
Pfizer-ის ვაქცინით აცრის შემდეგ, შესაძლებელია განვითარდეს აცრის ადგილის ტკივილი, სიწითლე და შეშუპება. ასევე, დაღლილობა, თავის ტკივილი, კუნთების ტკივილი, შემცივნება, ცხელება და გულისრევა.
ეს გვერდითი მოვლენები ჩვეულებრივ იწყება ვაქცინის მიღებიდან ერთი ან ორი დღის განმავლობაში. გვერდითი მოვლენები შეიძლება გავლენას ახდენდეს ყოველდღიური საქმიანობის უნარზე, მაგრამ ისინი რამდენიმე დღეში უნდა ალაგდეს. კვლევის პროცესში გამოვლინდა, რომ ისეთი გვერდითი მოვლენები, როგორიცაა ცხელება, შემცივნება, დაღლილობა და თავის ტკივილი უფრო ხშირი იყო ვაქცინის მეორე დოზის მიღების შემდეგ.
ოფიციალური მონაცემებით, გვერდითი მოვლენები ხშირი იყო, მაგრამ, ძირითადად, მსუბუქად და საშუალო სიმძიმით მიმდინარეობდა.
მწარმოებლის ინფორმაციით, ვაქცინით მასობრივი იმუნიზაციის პროცესში, ალერგიული რეაქციის რამდენიმე შემთხვევა დაფიქსირდა, რომლის შესწავლაც მიმდინარეობს.