ბაგებში, უნივერსიტეტის მაღლივ კორპუსთან არსებული საბაგირო მოქალაქეებს 20 აპრილიდან მოემსახურება, – ამის შესახებ დედაქალაქის მთავრობის სხდომაზე თბილისის მერმა კახა კალაძემ განაცხადა.
მისი თქმით, ბაგებში, უნივერსიტეტის მაღლივ კორპუსთან საბაგიროს სარეაბილიტაციო სამუშოები ჩაუტარდა, რომელიც ეკონომიკის სამინისტრომ განახორციელა.
„ეს არის 320 მეტრი სიგრძის საბაგირო გზა და იგი ახლა გადმოეცემა თბილისის მერიას. პარალელურად, ერთი თვის განმავლობაში განხორციელდება ტექნიკური შემოწმება, უსაფრთხოების სისტემების გამართვა, სარევიზიო სამუშაოები და ამის შემდგომ საბაგირო ჩაირთვება. 20 აპრილიდან ამუშავდება და მოსახლეობას მოემსახურება“, – განაცხადა კალაძემ.
მისი თქმით, საბაგირო განსაკუთრებით მნიშვნელოვანია სტუდენტებისთვის, რომლებიც აღნიშნული მიმართულებით გადაადგილდებიან.
თბილისის მერმა ასევე სხვა საბაგიროების მოწყობის შესახებაც ისაუბრა.
„ჩატარებული კვლევების შედეგად, გამოიყო ადგილები, სადაც საბაგიროს მშენებლობის პროექტების განხორციელებაა შესაძლებელი. კონკრეტულად ორ მათგანზე ვმუშაობთ. დეტალურ ანალიზს ვაკეთებთ და პროექტირება მიმდინარეობს. სამუშაოებს პროექტის მომზადების შემდეგ დავიწყებთ“, – განაცხადა კახა კალაძემ.