შვედეთის დედაქალაქ სტოკჰოლმში მიმდინარე მსოფლიოს 2021 წლის ჩემპიონატზე ფიგურულ ციგურაობაში, სპორტულ წყვილთა შორის საქართველოს ნაკრების დუეტი ფინალურ ეტაპზე გავიდა.
16 წლის ანასტასია მეტელკინასა და 21 წლის დანიილ პარკმანის წყვილმა მოკლე პროგრამაში 56.13 ქულა მოიპოვა, 17 ქვეყნის 24 მონაწილეს შორის მე-14 ადგილი დაიკავა და ფინალურ ოცეულში მოხვდა. ჩემპიონატზე სპორტული წყვილები გამარჯვებულს თავისუფალ პროგრამაში დღეს გამოავლენენ.
16 წლის მეტელკინასა და 21 წლის პარკმანის სპორტული წყვილი შარშან სექტემბრიდან შედგა. წყვილი 2021 წლის თებერვალში მოპოვებული ტექნიკური ქულების წყალობით, მსოფლიო ჩემპიონატზე პირველად ასპარეზობს. ქალთა შეჯიბრის მოკლე პროგრამაში მე-18 შედეგი აჩვენა და ფინალში ასპარეზობის უფლება მოიპოვა ალინა ურუშაძემაც, ხოლო ყინულზე მამაკაცთა მოკლე პროგრამაში 25 მარტს მორის ყვითელაშვილი გამოვა.