ნაძალადევის რაიონში მიწისქვეშა კომუნიკაციების რეაბილიტაცია 8 მისამართზე მიმდინარეობს. ინფრასტრუქტურული სამუშაოების საერთო ღირებულება 127 983 ლარია.
ერთ-ერთი პროექტი გურამიშვილის გამზირი N41 ა და ბ კორპუსებში ხორციელდება, სადაც წყალარინების მოძველებული ქსელი იცვლება. პროექტის ფარგლებში, 126 გრძივ მეტრზე ახალი მილები მოეწყობა, ასევე, დამონტაჟდება 11 საკომუნიკაციო ჭა.
სარეაბილიტაციო სამუშაოებს ნაძალადევის რაიონის გამგებელი ირაკლი ხელაძე ადგილობრივ მცხოვრებლებთან ერთად გაეცნო.
„ამ მისამართზე წყალარინების მოძველებული ქსელის გამო შეწუხებული იყო ადგილობრივი მოსახლეობა. გასულ წელს რეაბილიტაცია ჩავუტარეთ N41 კორპუსის ქსელს, ამ ეტაპზე, ვცვლით ა და ბ კორპუსების სისტემას. მიწისქვეშა კომუნიკაციების რეაბილიტაციის შემდეგ, ასფალტის საფარიც დაიგება. ამ პროექტით საერთო ჯამში, 172 ოჯახის პრობლემა მოგვარდება“, – განაცხადა ირაკლი ხელაძემ.
აღნიშნული ინფრასტრუქტურული სამუშაოებისთვის ნაძალადევის რაიონის გამგეობა 44 533 ლარს დახარჯავს.