საქართველოს კულტურის პალატის პრეზიდენტი დავით ოქიტაშვილი გამოეხმაურა კულტურის მინისტრ თეა წულუკიანს, რომელმაც განაცხადა, რომ ყველა განსხვავებული აზრით დაინტერესდება. „რუსთავი 2“-ის ეთერში დავით ოქიტაშვილი ამბობს, რომ თეა წულუკიანის ამ განცხადების შემდეგ კითხვები არ გასჩენია და ის აღიქვა ისე, რომ კულტურის სფეროში მოღვაწე ადამიანებს აზრის თავისუფლად გამოთქმის საშუალება აქვთ.
„ეს განცხადება მე გავიგე ასე, რომ კულტურაში მოღვაწე ადამიანებს აქვთ თავისუფლად აზრის გამოთქმის საშუალება, მაგრამ როდესაც შენ მუშაობ კულტურის სამინისტროში, სახელმწიფო სტრუქტურაში და ამბობ, რომ უნდა დაამხო ეს მთავრობა, მას „კრიმინალურს“ უწოდებ, ეს ცოტა უხერხულია, ვინაიდან „კრიმინალური“ მთავრობისაგან იღებ ხელფასს. რასაკვირველია, ამ კუთხით მინისტრს გარკვეულწილად ვეთანხმები. რაც შეეხება კულტურის სფეროს მუშაკებს, მან ხმამაღლა თქვა, რომ ამ სფეროში მოღვაწე ყველა ადამიანს აქვს აზრის გამოთქმის საშუალება და აზრს მათ ვერავინ ვერ შეუზღუდავს. მე კითხვები არ გამჩენია, ვინაიდან ეს განცხადება ზუსტად ესე გავიგე, იმიტომ რომ კულტურის სფეროში ადამიანები რამდენადაც განსხვავებული აზრი ჰქონდეთ, ვერც მინისტრი, საერთოდ ვერავინ ვერ აუკრძალავს მათ ეს აზრი რომ თქვან. მე მათ ვუცხადებ სოლიდარობას და ასეც უნდა იყოს“, – ამბობს დავით ოქიტაშვილი.