რატი ბრეგაძე სოციალურ ქსელში პოსტს აქვეყნებს და “ტვ პირველის” მიერ, დავით სუჯაშვილის შესახებ მომზადებულ სიუჟეტს ეხმაურება.
“დავით სუჯაშვილი ჩემი ახლო მეგობარი, ღირსეული ადამიანი, სანიმუშო მეოჯახე და ძალიან დიდი გამოცდილების მქონე, შრომისმოყვარე კოლეგაა. დათო მთელი შეგნებული ცხოვრება საქართველოს უსაფრთხოებას ემსახურება და მისი წინა სამსახურიდან გამომდინარე ბევრი აქვს გაკეთებული ჩვენი ქვეყნისათვის, რომელსაც გასაგები მიზეზების გამო ალბათ ვერც ვერასოდეს გავიგებთ. ცნობისათვის ისიც უნდა ითქვას, რომ დაზვერვის სამსახურის მოსამსახურეები შემდეგ ფიცს დებენ: “ვემსახურებით საქართველოს, ვცოცხლობთ საქართველოსთვის!” ეს ბოლო ორი სიტყვა სწორედ დათოს ინიციატივით შეემატა ფიცის ტექსტს და მრავალზე მეტყველებს…
მისი კეთილსინდისიერებიდან და პატრიოტიზმიდან გამომდინარე აბსურდულია ყველა შეთითხნილი ბრალდება, რომლის თანახმადაც თითქოს მას არალეგალური შემოსავლები ჰქონდეს იმის გამო რომ მისი ნათესავი ბიზნესმენია.
სიტყვის თავისუფლება ერთ-ერთი მთავარი მონაპოვარია საქართველოში და არც არასოდეს ყოფილა ასეთ მაღალ ხარისხში როგორც დღესაა. ამ მიღწევას ყველა უნდა მოვუფრთხილდეთ, მათ შორის მედიაც, რომ ნებსით ან უნებლიედ გადაუმოწმებელი და ერთმანეთთან ლოგიკურ კავშირში არ მყოფი “ფაქტების” გავრცელებით მცდარი საზოგადოებრივი აზრის ჩამოყალიბებას ხელი არ შევუწყოთ და ქვეყნის არაკეთილმოსურნეს წისქვილზე წყალი არ დავასხათ.
სიუჟეტის შემქმნელებს, არც იმის გაგება უნდა გასჭირვებოდათ, რომ რამდენიმე დღეა დავითი კოვიდით ინფიცირების გამო ერთ-ერთ კლინიკაში მკურნალობს და მსგავსი სიუჟეტები არცთუ ისე დადებითი გავლენის მქონეა ჯანმრთელობის მდგომარეობაზე.
პირველ რიგში ჯანმრთელობა ჩემს დავითს და სიმართლე აუცილებლად გაირკვევა.”-წერს ბრეგაძე.