ჭყონდიდის ეპარქია საკუთარ Facebook-გვერდზე მიტროპოლიტი სტეფანე კალაიჯიშვილის მიერ მეუფე პეტრესთვის, 2017 წელს გაგზავნილ წერილს ასაჯაროებს.
წერილში მიტროპოლიტი სტეფანე მეუფე პეტრეს საჯაროდ გაკეთებულ განცხადებებს ახსენებს და პატრიარქთან მონანიებისკენ მოუწოდებს.
როგორც ეპარქიის მიერ გამოქვეყნებულ საჯარო პოსტშია აღნიშნული, წერილს იმის გამო აქვეყნებენ, რომ ყოფილი ჭყონდიდელი მიტროპოლიტი პეტრე იმ „უფსკრულის პირას“ აღმოჩნდა, რის შესახებაც მიტროპოლიტი სტეფანე 2017 წელს აფრთხილებდა.
ცნობისთვის, ჭყონდიდის ეპარქიაში დაპირისპირება, ბოლო რამდენიმე თვეა, უკიდურესად დაიძაბა. მეუფე სტეფანე იმ პირებს, რომლებიც მის წინააღმდეგ გამოდიან და ეპარქიას უპირისპირდებიან, „ბოლო გაფრთხილებას“ აძლევს და ამბობს, რომ ეპარქია მათ წინააღმდეგ ეკლესიურ მეთოდებს გამოიყენებს.
24 მარტს მორიგი დაპირისპირება მოხდა მხარეებს შორის. მეუფე სტეფანე პირად ბრალდებებს უყენებს ჭყონდიდის ეპარქიის ყოფილ მიტროპოლიტს, პეტრე ცაავას, რის საპასუხოდაც, ცაავას მხარდამჭერებმა ოფიციალური წერილით მიმართეს სტეფანე კალაიჯიშვილს, რომ მიტროპოლიტმა დაამტკიცოს პეტრე ცაავას მიმართ წაყენებული ბრალდებები. წერილს ხელს 20-მდე სასულიერო პირი აწერს. ბრალდება პეტრე ცაავას მისამართით არის ის, რომ მას, ეპისკოპოსების პერიოდში, შვილი ეყოლა და ის გერმანიაში ცხოვრობს.