ჩემი ხედვაა ის, რომ რაც შეიძლება ნაკლები ბარიერი ჰქონდეს ბიზნესს, მინიმალური ბიუროკრატია, როგორც ცენტრალური მთავრობის, ისე რეგიონების დონეზე, – ამის შესახებ საქართველოს პრემიერ-მინისტრმა ირაკლი ღარიბაშვილმა დღეს, პროექტის „100 საინვესტიციო შეთავაზება ბიზნესს“ პრეზენტაციაზე განაცხადა.
„სწრაფი გადაწყვეტილებები და ერთობლივი კოორდინირებული მუშაობა, სახელმწიფო, ბიზნესი, მოქალაქე, ეს სამი სუბიექტი უნდა გავერთიანდეთ. დღეს არის გაერთიანების დრო, რომ ქვეყანა გამოვიყვანოთ მძიმე ეკონომიკური კრიზისიდან, რომელიც წლების განმავლობაში დაგროვდა“, – განაცხადა ღარიბაშვილმა.
ამასთან პრემიერ-მინისტრმა აღნიშნა, რომ ქვეყანაში პრობლემები 90-იანი წლებიდან დაგროვდა და ეს არაა გამოწვეული მოკლე შოკებითა და არასწორი გადაწყვეტილებებით. „ესაა პრობლემები, რომლებიც მემკვიდრეობით გვერგო და ამას სჭირდება გადაწყვეტა. მინდა, დაგიდასტუროთ სრული მზაობა თანამშრომლობისთვის და მხარდაჭერას კიდევ ერთხელ გიცხადებთ“, – აღნიშნა ღარიბაშვილმა.