“ოპოზიციას ამოჩემებული აქვს მესიჯი, რომ “ქართული ოცნება” მუშაობს რუსეთზე – გამოჩნდა, რომ ამერიკაში არ ფიქრობენ ასე”

პოლიტიკის ექსპერტის, თორნიკე შარაშენიძის შეფასებით, ოპოზიცია არასწორი მიმართულებით მუშაობს, როდესაც „ქართული ოცნებისა“ და რუსეთის ერთმანეთთან დაკავშირებას ცდილობს. მისი თქმით, ბოლოდროინდელი განცხადებებით გამოჩნდა, რომ აშშ-ში ასე არ ფიქრობენ.

„ოპოზიციას დღემდე აქვს ამოჩემებული ეს მესიჯი, რომ „ქართული ოცნება“ მუშაობს რუსეთზე. სენატში მოსმენების დროს, ასევე, როცა იან კელიმ მისცა ინტერვიუ ერთ-ერთ ტელეარხს, ძალიან კარგად გამოჩნდა, რომ არ ფიქრობენ ამერიკაში ასე. ასე რომ, ოპოზიცია ამ მხრივ ტყუილად ხარჯავს რესურსს. ჯობია აქცენტი გააკეთონ სხვა, უფრო რეალისტურ თემებზე, რომელიც პირდაპირ ხელისგულზე ჩანს. არ არის ასეთი აშკარა ამერიკელებისთვის, რომ საქართველოს მთავრობა ემსახურება რუსეთს. ნატოს საწვრთნელი ცენტრი საქართველოში, ნატოსთან არსებითი პაკეტი, ევროკავშირთან ასოცირების შეთანხმება – როცა ეს გაქვს, ძალიან ძნელია დაუმტკიცო, მართალი რომც იყო, ჩუმად მუშაობენ რუსეთზე. ჩემი აზრით, უკვე მე-9 წელია ოპოზიცია არასწორი გზით მუშაობს და ესეც არის მიზეზი იმისა, რომ მარცხდებიან და ყოველ შემთხვევაში, ვერ იმარჯვებენ“,- განაცხადა თორნიკე შარაშენიძემ.