საქართველოს დასავლელი პარტნიორები არ არიან აქ იმისთვის, რომ პარტიებს თავს მოახვიონ გადაწყვეტილებები. ეს არ არის ევროკავშირის მეთოდები. ჩვენი მეთოდი მედიაციაა, ასე რომ საქართველოს ლიდერები უნდა წავიდნენ კომპრომისებზე და გაუმკლავდნენ ამ გამოწვევებს, – ამის შესახებ ევროკავშირის საბჭოს პრეზიდენტ, შარლ მიშელის პირადმა წარმომადგენელმა, კრისტიან დანიელსონმა შეხვედრის დასრულების შემდეგ განაცხადა.
მისივე თქმით, იყო ელემენტები, რომელზეც თანხმობა იყო მიღწეული – ეს იყო საარჩევნო რეფორმა, მართლმსაჯულების რეფორმა და ძალაუფლების გადანაწილება. ეს პოზიტიურია და ამ მიმართულებით მუშაობა გაგრძელდება
„დღეს დავასრულე მეორე მედიაციის მისია საქართველოში, როგორც შარლ მიშელის პირადმა წარმომადგენელმა. ვიქნები ძალიან მკაფიო: ამ კრიზისის გადაწყვეტა არსებობს. ეს არის გადაწყვეტილება, რომელიც მოიცავს ძალიან მნიშვნელოვან საარჩევნო და მართლმსაჯულების რეფორმებს. ეს არის გადაწყვეტილება, რომელიც მოიცავს ძალაუფლების გადანაწილებას, განსაკუთრებით – პარლამენტში, უზრუნველყოფს ანგარიშვალდებულებას საქართველოს მომავალზე და დაასრულებს გაგრძელებულ დებატებს საკვანძო პოლიტიზებულ სასამართლო საქმეებსა და ადრეულ არჩევნებზე. ეს არის გადაწყვეტილება, რომელიც პოლიტიკურ გამბედაობასა და პასუხისმგებლობას მოითხოვს. წარმოვადგინე წინადადება ასეთი გადაწყვეტილების შესახებ და ის ახლა გასაჯაროვდება. ეს გადაწყვეტილება ქვეყნის ინტერესებს ყველა საკითხზე მაღლა აყენებს. სამწუხაროდ, არცერთმა პოლიტიკურმა პარტიამ ეს გადაწყვეტილება არ მიიღო. იყო ელემენტები, რომელზეც თანხმობა იყო მიღწეული – ეს იყო საარჩევნო რეფორმა, მართლმსაჯულების რეფორმა და ძალაუფლების გადანაწილება. ეს პოზიტიურია და ამ მიმართულებით მუშაობა გაგრძელდება. საბოლოო ჯამში, საქართველოს დასავლელი პარტნიორები არ არიან აქ იმისთვის, რომ პარტიებს თავს მოახვიონ გადაწყვეტილებები. ეს არ არის ევროკავშირის მეთოდები. ჩვენი მეთოდი მედიაციაა, ასე რომ საქართველოს ლიდერები უნდა წავიდნენ კომპრომისებზე და გაუმკლავდნენ ამ გამოწვევებს. კომპრომისი არის სიძლიერე და არა სისუსტე. ევროპულ მისწრაფებებს სჭირდება კომპრომისები, განსაკუთრებით იმ პარტიისგან, რომელიც ხელისუფლებაშია, რათა ქვეყანა გამოიყვანოს კრიზისიდან. რა თქმა უნდა, დიდ ამბიციებთან ერთად დიდი პასუხისმგებლობა მოდის. სამწუხაროდ, მაგიდასთან არ ყოფილა მზაობა კომპრომისის მისაღწევად“, – განაცხადა დანიელსონმა.