ზუგდიდში, სამგზავრო მატარებელი ქვეითად მოსიარულეს დაეჯახა. შემთხვევა რკინიგზის სადგურზე რამდენიმე წუთის წინ მოხდა. მოქალაქე სავარაუდოდ ლიანდაგზე გადადიოდა და მატარებლის გამაფრთხილებელი სიგნალი ვერ შენიშნა. დაშავებული ქალაქის რეფერალურ საავადმყოფოშია გადაყვანილი და მართვით სუნთქვაზეა. როგორც კლინიკაში აცხადებენ, დაშავებულის ჯანმრთელობის მდგომარეობა მძიმეა.
„112-ის მიერ, სატრანსპორტო შემთხვევის შედეგად შემოიყვანეს ასაკოვანი ქალი, მარცხენა ქვედა კიდურის ტრავმული ამპუტაციით, წვივის ზედა მესამედის დონეზე, ჰიპოვოლემიური შოკი. პაციენტი გადაუდებელი მედიცინის განყოფილებაში გადაყვანილია მართვით სუნთქვაზე და სასიცოცხლო ჩვენებით გადადის საოპერაციო ბლოკში. ავადმყოფის ზოგადი მდგომარეობა კრიტიკულად მძიმეა“, – განაცხადა საავადმყოფოს კლინიკურმა მენეჯერმა სულხან ორჟონიამ.
ზუგდიდში მომხდარ ფაქტზე გამოძიება სისხლის სამართლის კოდექსის 275-ე მუხლის მე-2 ნაწილით მიმდინარეობს – რაც, რკინიგზის ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის დაზიანება გამოიწვია.