შევძლებთ კი, ისე ვიცხოვროთ და ვიღვაწოთ ჩვენი სამშობლოსათვის, როგორც ისინი იღვწოდნენ და იწვოდნენ?! – ამის შესახებ ირმა ინაშვილი სოციალურ ქსელში წერს.
“ანზორ ერქომაიშვილი… გურამ დოჩანაშვილი… ისეთი ხალხი გვტოვებს, ვინ ვრჩებით, რანი ვრჩებით, სად ვრჩებით…
შევძლებთ კი, ისე ვიცხოვროთ და ვიღვაწოთ ჩვენი სამშობლოსათვის, როგორც ისინი იღვწოდნენ და იწვოდნენ?!
შევძლებთ კი, არ დავკარგოთ ჩვენი ეროვნული ცნობიერება, ტრადიციები, ზნე-ჩვეულებანი, ენა, კულტურა, სარწმუნოება?!
შევძლებთ კი, ჯერ სულიერი გვქონდეს წინა პლანზე და მერე მიწიერი?!
შევძლებთ, რომ ვაშენოთ და მუდმივად არ ვანგრიოთ, გვახარებდეს მოყვასის სიკეთე და ჩვენი მარჯვენა ხელი “ფეისბუქში” მხოლოდ შურიან, ბოროტ პოსტებს არ წერდეს?!
შევძლებთ, რომ არ შევჭამოთ და გავანადგუროთ ერთმანეთი?!
შევძლებთ, რომ ცხვარს და მგელს ვარჩევდეთ ერთმანეთისგან?!..
შევძლებთ, რომ ქვეყანაზე ფიქრი, ზრუნვა, ქვეყნისთვის შრომა, თავდადება და ამ თავდადების მაგალითი ფეხქვეშ არ ითელებოდეს?!
რამეს… ოდესმე შევძლებთ?! დიდი გამოფხიზლება გვჭირდება, დიდი”, – წერს ირმა ინაშვილი.