ჭყონდიდის მიტროპოლიტმა სტეფანემ 5 სასულიერო პირს მღვდელმსახურების უფლება შეუჩერა.
მღვდლობიდან განკვეთილი არქიმანდრიტი ათინოგენი (მდივანი).
ასევე, მიტროპოლიტის ბრძანებით, “დანაშაულების გამო” მღვდელმსახურება აეკრძალათ იღუმენ დანიელს (გვილავა), მღვდელს მირიან (მესხიძე), მღვდელმონაზონ ლუკას ( იბრაგიმოვი ), დიაკონ ანანია (კალანდიას).
სასულიერო პირები გადაწყვეტილებას უკანონოდ მიიჩნევენ და ამბობენ, რომ ეპისკოპოსმა კანონებს არასწორი ინტერპრეტაცია გაუკეთა.
მამა მირიან მესხიძე ამბობს:
“არ ვაპირებთ, რამე პროვოკაცია მოვაწყოთ. მხოლოდ ის გვინდა, საეკლესიო სამართლის მიხედვით გადაწყდეს პრობლემა. არ ვიცით, რა გაგრძელება ექნება ამას. მხოლოდ ის ვიცი, რომ მღვდელმსახურება მაქვს შეჩერებული. დანარჩენს ვნახავთ დროთა განმავლობაში”.
არქიმანდრიტ ათინოგენის თქმით:
“ჩემგან გადაეცით (ეპისკოპოსს), მატყუარას, ცრუს, ურცხვს – ასეთი მე არც ეპისკოპოსი მინდა, არც სინოდის წევრი მინდა. არ ვუსმენ. ვაპირებ სიცოცხლეს ქრისტეში. იმან შეიძლება ბევრი რამე თქვა, მაგრამ ყველა უნდა დავემორჩლოთ? მე არ ვემორჩილები.
ის, რომ მე არც არქიმანდრიტობისთვისმოვსულვარ ეკლესიაში, მღვდლობის პატივზე კიდე ვფიქრობდი, რომ არასდროს ვიყავი ამის ღირსი. სულ მიკვირდა, ღმერთი რა მოწყალე იყო ჩემ მიმართ. კი ბატონო, თუ ღმერთმა ასე გადაწყვიტა. მაგრამ ჯერ კიდევ გასარკვევია – ეს ერთპიროვნულად არ უნდა გადაწყვეტილიყო. მე უნდა დავებარებინეთ, როგორც წესი და კანონია”.
მიტროპოლიტმა სტეფანემ კიდევ 2 სასულიერო პირს მღვდელმსახურების უფლება მარტის დასაწყისში შეუჩერა, მოგვიანებით კი დედა სოსანა გადააყენა მარტვილის წმინდა ნინოს მონასტრის წინამძღვრობიდან.
მიზეზი მათ მიერ ყოფილი ჭყონდიდელი ეპისკოპოსის, პეტრე ცაავას მხარდაჭერა.
მრევლის ნაწილი მათ ეწინააღმდეგება და ეპისკოპოსი პეტრეს მიერ გაკეთებული განცხადებების ნამდვილობის და მისი სიმართლის დადასტურებას ითხოვს.
პეტრე ცაავა საპარტრიარქოს გიორგი მამალაძის საქმის გამო დაუპირისპირდა. მოგვიანებით კი, 2019 წლის 31 ოქტომბერს, მედიას მისი განყენების შესახებ წინასწარ აცნობა და მიზეზად მისი მხრიდან სინოდის სხდომაზე „საქართველოს ეკლესიაში პიდარასტიის, მამათმავლობისა და პიდარასტული ცოდვის მხილება“ დაასახელა.
მოგვიანებით თავად მიტროპოლიტი პეტრეს მიმართ გაჩნდა ბრალდება – თითქოს მას შვილი ყავს, რომელიც გერმანიაში ცხოვრობს. ცაავას მხარდამჭერები ბრალდების დამტკიცებას ითხოვენ.