სალომე ზურაბიშვილი სიკვდილის შემდეგ დათა ვანიშვილს მედლით „სამოქალაქო თავდადებისათვის“ დააჯილდოებს.
პრეზიდენტის პრესსამსახურის ინფორმაციით, ორბელიანების სასახლეში, დღეს, 18:00 საათზე, საქართველოს დამოუკიდებლობის აღდგენის 30 წლისთავისადმი მიძღვნილი ღონისძიება გაიმართება.
ღონისძიების ფარგლებში საქართველოს პრეზიდენტი მიწვეულ სტუმრებს სიტყვით მიმართავს და დათა ვანიშვილს (სიკვდილის შემდეგ) მედლით „სამოქალაქო თავდადებისათვის“ დააჯილდოებს. სახელმწიფო ჯილდო დათა ვანიშვილის ოჯახს გადაეცემა.
დათა ვანიშვილმა ოკუპირებულ ტერიტორიაზე მოქცეული სახლი არ მიატოვა და მეუღლესთან ერთად, იქ განაგრძო ცხოვრება. დათა ვანიშვილი ოკუპაციასთან ბრძოლის სიმბოლოდ იქცა. 2014 წელს ის ოკუპანტებმა იმის გამო დააკავეს, რომ საქართველოს ცენტრალური ხელისუფლების მიერ კონტროლირებად ტერიტორიაზე პენსიის ასაღებად იყო გადმოსული. საოკუპაციო რეჟიმის აკრძალვების მიუხედავად, დათა პაპა მაინც ახერხებდა თითქმის ყველა არჩევნების დროს გადმოსვლას და საკუთარი პოზიციის დაფიქსირებას. ის 88 წლის ასაკში, 19 მარტს გარდაიცვალა.